Tivolimi Nunatsinnut tunngatillugu pisussat aalajangerneqarput
Nipilersortussat assigiinngiiaarnissaat aaqqissuisunit pingaartinneqartoq, aaqqissueqataasoq Miki Jensen oqarpoq.
- Ulf Fleischer, Paarisa Bandili 90-ikkunni saqqummermat nuannarineqarluartut, taanna eqqaakulunnermut tunngatillugu Tivolimut tulluaqimmat, ilaanissaat ingerlaannarluta aaliangerparput. Taava aamma nipilersortartut inuusuttunuunerusut saqqummeqqammersut, soorlu Uyarakq, Nikolaj Lønstrup aamma Kimia ilaatissallugit uatsinnut pingaartorujussuuvoq, Miki Jensen Kalaallit Nunaat Tivolimik ukiuni arlaqartuni aaqqissueqataasartoq oqarpoq, nangillunilu.
- Aamma Kalaallit Nunaanniit naleqquttut allat, nunallu assigiinngitsut akornanni nuannarineqarluartut, Nanook, Simon Lynge aamma Small Time Giants aamma appisimaartussaasut, Miki Jensen oqarpoq.
Takutitsisussalli nipilersortuinnaanavianngillat.
Isiginnaartitsineq nutaaq
Nuka Alice Lundip sassuma arnaata oqaluttuarineqarnera nutaalianngorlugu, Tivolimi aalisakkanik uumatitsivimmi akvariummimi ukioq manna siullerpaamik takutitsissutigissavaa.
- Akvaria atunngisaannarparput, aatsaat ukioq manna takoqqaaratsigu assut soqutiginarami nuannerpasillunilu. Taamaammat eqqarsarpugut, arlaannik tassani susoqassaaq, taava sassuma arnaata oqaluttuarineqarnera tassani saqqummiunneqarnissaa isumassarsiarivarput, Miki Jensen oqarpoq.
Kalaallit Tivolimi naapeqatigiinnissaat ulluni marlunni ingerlanneqassaaq tassalu juulip 31-anni nalunaaqutaq 12:30 ammarneqariarluni aggustip ulluisa aallaqqaataanni 23:45 naggaserneqassaaq.