Titartakkanik nuannarisalinnut nutaarsiassatsialak

Titartaasartup Nuka K. Godtfredsenip atuakkat titartakkat saqqummersitaasa "Oqaluttuanik" taaguuteqartut aappaat saqqummersinneqassaaq, tassani Kalaallit Nunaata oqaluttuarsartaa atuakkiaraa, taakkualu katillutik sisamaasussaapput.

Atuakkat saqqummertut ataqatigiissut siullersarsaat taaguuteqartoq  ”Tutineq siulleq”, Kalaallit Nunaata qangarsuaq oqaluttuassartaanik imalik. Ullumi saqqummersinneqartussaq  taaguuteqartoq ”Ukaliatsiaq”  kinguaariit 180-it missaanniittut matuma siornagut pisimasuutinneqarpoq, imaluunniit ukiut 3500-t matuma siorna pisimasuutinneqarluni.

Atuakkami ullumi saqqummersinneqartussami ukioq 1100-p missaani pisut oqaluttuarineqarput tassani  inuiaat torngit imaluunniit tunit inuunerisa nalaanni pisuupput  taakkua Kalaallit Nunaata Canadallu avannarppiarsuanni inuunerat oqaluttuarineqarlutik.

Aamma tamatuma nalerpiaani Islandimiit aamma Norgimit naasorissaasut, kiisalu qeqertanit Tuluit Nunaata avannarpasissuaneersut Kujataanut anngussimanerat pillugu oqaluttuarineqarput.

Atuagaq ullumi saqqummersinneqartussaq atuagaq siulleq saqqummersinneqartoq assigalugu kalaallisut danskisut tuluttullu allataavoq.

Atuagaq kusanartunik titartakkanik assiliartalersorneqarsimasoq 60-inik qupperneqarpoq,

Atuakkap suliarineqarnerani Nuka K. Godtfredsen-ip Danmarkimi katersugaasivissuarmi Danmarks Nationalmuseum-imi itsarnisarsiooq Martin Appelt qanittumik suleqatigaa, atuakkiami oqaluttuarineqartut eqqortuunissaat pillugu.

Atuakkat saqqummersinneqartussat tullii marluk ukiut sisamat tulliuttut ingerlaneranni saqqummersinnissaat naatsorsuutigineqarpoq.