Titartakkanik atuakkiaq naliliisartut nersualaarpaat

- Oqaluttualiaq ataasiakkaat ilanngullugit peqqissaartumik ilisimatuussutsikkut tunngavilersorluarneqarsimavoq, ilisimatuussuserli aporfiginagu nunannivissumik oqaluttualiorsimavoq, aviiseerarlu Kalaallit Nunaata Danmarkillu avataanut siammartinneqarneqartariaqarluni.

Nuka Godtfredsenip atugaaraliaa Ukaliatsiaq aviisimi Berlingske Tidende-imi nersornerissutinik ullorissanik tallimanik tunineqarpoq.

Aamma aviisimi politiken-imi naliliisartup Ukaliatsiaq nuannarlugu allaaserivaa.

- Godtfredsenip isumassarsiullaqqinnera kusanavissunillu assitalersuisimanerata saniatigut seqernup kaaviinnaleruttorfiata nalaani apummi qaamaneq atuagaaqqiamini siullermi torrallassimavaa. Uanili atuagaaraliaata aappaani angakkup eqqarsartaaserisimassagunangaa torrallavillugu eqqorniarsarisimavaa angalaneratalu oqaluttuassartaa torrallassimallugu.

Aviisi politiken-ip Nukap atuagaaraliaa tallimanik uummataasalerpaa.

Weekendavisen-ili naliliigaangami ullorialersuineq ajorpoq, taamaattorli Nukap titartagai torrallataalluinnarnerarpai, taamaakkaluartorli itsarsuaq sakkut atortullu suuneri nassuiaaserneqarneri sukumiinerusut ujartorlugit.

Atuagaaraq Ukaliatsiaq Ilinniusiorfiup Danmarkillu Katersugaasivissua suleqatigiillutik saqqummersippaat. Aviiseeqqamut isumassarsisoq tassaavoq Martin Appelt.