Titartaanermik unammisitsinerup siunissaq imigassamit ajoquserneqanngitsoq takutissagaa
Meeraavit atuartuullutillu? Taama qalipaatitit inngigissassavatit.
Nunatsinni meeqqat inuusuttullu siunissaq imigassamik ajoquserneqanngitsoq pillugu takorluukkatik januaarip 24-ata tungaanut titartassavaat.
Titartaanermimi ‘Siunissaq, arlaannaalluunniit imigassamit aalakoornartortalimmit ajoquserneqanngitsoq’-mik qulequtaqartumi peqataassapput.
Meeqqallu tusarnaarneqassapput. Titartakkammi unammisitsinerup kingorna imigassap kinguneri pillugit oqaloqatigiinnermut siuarsaanermut inuiaqatigiinnillu toqqissisimasunik pilersitsinissamut periarfissanik pilersitsinissamut atorneqassapput.
Peqqinnissamut Naalakkersuisoqarfik tusagassiuutinut nalunaarummi allappoq. Taakku Innuttaasut Peqqissusiannik Ilisimatusarfik, Paarisa, WHO Europa aamma UNICEF Kalaallit Nunaat peqatigalugit meeqqat siunissaq imigassamik ajoquserneqanngitsoq pillugu takorluugaannik ersersitsinissamut aaqqissuuppaat.
Pingasunik ajugaasoqassasoq
Unammisitsisoqarmat pingasunik ajugaatitsisoqarumaarpoq.
Meeqqani nukarlerni, akullermi aamma angajullerni ajugaatitsisoqassaaq. Klasseqatigiit ajugaasut immikkut 3.000 koruuninik akissarsitinneqassapput.
Ajugaasunik toqqaanermi isumassarsiaq aamma pinngorartitsisinnaanikkut suliarineqarnerat nalilerneqassasoq, naalakkersuisoqarfik tusagassiuutinut nalunaarummi allappoq.
Titartakkat tamarmik imigassanut politikki pillugu ilisimatusarnermi ukiunut arlalinnut politikkikkut innersuussuteqarnermi saqqummersinneqassasut, naalakkersuisoqarfik allappoq, atuarfiit ilinniartitsisullu unammisitsineq atuartunut imigassaq pillugu oqaloqatigiinnermut atussagaat aamma neriuutigaa.
