Tine Pars: Nalunaarusiaq 'Kalaallit Nunaannut iluaqutissaaqqullugu' soorunami politikkikkut oqariartuuteqarpoq
Nalunaarusialli inerniliinera equgavoq politikkilu malillugu suliaalluni, taama isumaqarpoq Aningaasaqarnermut Naalakkersuisoq, Vittus Qujaukitsoq, naak taassuma, nalunaarusiaq arfininngormat kingullermik saqqummersinneqarmat nersualaaraluarlugu.
- Nalunaarsuiap politikkikkut oqariartuuteqannginnerarlugu oqartoqarneranut tunngatillugu isumaqarpunga, tamanna eqqunngitsuusoq, tassami nalunaarusiami oqariartuutigineqarpoq, Nunatta aatsitassanik aningaasatigut isaatitsilernerani, Nunarput namminiilivissinnaassanngitsoq.
Aningaasaqarnermut Naalakkersuisoq, Vittus Qujaukitsoq oqarpoq naqissuserluguli, nalunaarusisami allaaserineqartoq, tassalu aatsitassarsiornerinnaanngitsoq aningaasatigut isaatitsiffiginagu aamma allatigut aningaasarsiorsinnaanerput inassutigineqartoq isumaqatigalugu oqarluni.
- Tassami aalisarneq, aatsitassarsiorneq, takornariaqarneq nunamilu suliffiit tamaaasa aningaasarsiorfissatut qimerloortariaqaratsigit tamaasa ataatsimut, taamaasilluta aatsitassarsiornerinnaq kisiat aallunnagu. Aningaasaqarnermut Naalakkersuisoq, Vittus Qujaukitsoq oqarpoq.
Nalunaarusiamik 'Kalallit Nunaannut iluaqutissaaqqullugumik' isornartorsiuisoq alla tassavoq, Islandimiu inatsisit pillugit professori, Gudmundur Alfredsson. Taanna nalunaarusiap allanneqarneranut peqataavoq.
- Nalunaarusiap allanneqarnerani Naalagaaffeqatigiinneq toqqammavigineqarpoq, isumaqarpungalu naalagaaffeqatigiinnerup pingaaruteqassusia ingasaanneqarluni allaaserineqartoq. Isumaqarpungalu Kalaallit Nunaata nunanik allanik suleqatissarsiornerani Danmark immikkut isigineqartariaqanngitsoq.
Gudmundur Alfredsson oqarpoq. Taassuma ilanngullugu oqaatigaa, Kalaallit Nunaata aningaasat pisariaqartitaat nunanit allanit pissarsiarineqarsinnaalluartut.
- Kalaallit Nunanni aningaasaliinissamut ujarlerfissat amerlapput, Altantikup kitaaniittut nunat aamma kangianiittut nunat suleqatissarsiarineqarsinnaalluarput, taamaattumik nunat tamakku misissuiffigineqassasut isumaqarlunga.
Islandimiu inatsisit pillugit professori aamma nalunaarusiamik suleqataasoq, Gudmundur Alfredsson taama oqarpoq.
Ilisimatusarfiup rektoriata, Tine Parsip aamma Københavnip Universitetiata rektoriata suleqatigiillutik nalunaarusiortitsipput aamma nalunaarusiap suna siunertarineraa taakku siunnersuutigisimallugu.
- Naalagaaffeqatigiinnerup iluani pitsaanerpaamik suleqatigiinnikkut, aatsitassat piiarneqarnissaannut tunngasumik qanoq angusaqartoqarsinnaanersoq misissorneqarnera allaaserineqarneralu soorunami politikkiusut oqaatigineqarsinnaavoq. Tassami Naalagaaffiup maanna qanoq isikkoqarnera aallaavigalugu nalunaarusiortut sulisinneqarput. Taamaattumik politikkiusutut oqaaseqarfigiinnarsinnaavara. Ilisimatusarfiup rektoria, Tine Pars taama oqarpoq.
Islandimiu inatsisit pillugit professori, Gudmundur Alfredsson aamma Aningaasaqarnermut Naalakkersuisoq, Vittus QWujaukitsoq isumaqarput, nalunaarusiaq ataatsimut isigalugu silappaarilluni atorluarneqarsinnaasumillu suliaasoq.
