Timmisartuussinerit 17.000-it unitsiinnarneqarput

Kujasinnerpaami Parisimiit avannamut Nunarput ilanngullugu timmisartuussineq ullumikkut taamaatiinnarneqarpoq. Tamatuma kinguneranik timmisartuussinerit katillugit 17.000-it missaannniittut ullumikkut taamaatiinnarneqarput, Eurocontrol Europami timmisartuussinermik oqartussaqarfik DR-imut taama ilisimatitsivoq.
Allattoq Elisa Isaksen
apriilip 16-at 2010 07:40

Islandimi qaqqaq innermik anitsisup arsakui pissutigalugit timmisartuussinerit taamaatiinnarneqarput. Tallimanngornermi nalinginnaasumi timmisartut 600-t missaat Atlantikoq qulaallugu timmisartuussisaraluarput. Ullaaq manna Europami timmisartut 100-120-t missaanniittut Amerikamit Avannarlermeersut, Kujallermeersut Qiterlermeersullu minnissaat naatsorsuutigineqarpoq, taakkua nalinginnaasumik 300-t missaanniittaraluarput.

Nunani ukunani timmisartuussineq maanna uninngatinneqarallarpoq: Irland, Tuluit Nunaat, Belgia, Holland, Danmark, Sverige, Norge, Finland, Estland.

Taakkua saniatigut Frankrigip avannaani timmisartuussineq Parisi ilanngullugu matoqqatinneqarpoq. Tysklandimi aamma illoqarfinni ukunani timmisartuussisoqanngilaq Düsseldorf, Køln, Hamborg aamma Berlin.

Air Greenlandip Nunatsinnit Danmarkimut Danmarkimiillu timmisartuussinerit ippassarli taamaatiinnarpai.Tassani pineqarlutik GL 781 Københavnimiit Kangerlussualiartussaagaluaq aamma GL 782 Kangerlussuarmiit Københavniliartussaagaluartoq.

Sapaatip akunnerata naanerani timmisartuussinernik taakkununnga taartaasussanik Air Greenland pilersaaruteqarpoq, taamaalilluni sisamanngornermi ilaasussaagaluit arfininngorpat timmisartuunenqassallutik ullumikkullu ilaasussaagaluit sapaatiuppat timmisartuunneqassallutik. Maannamut ilaasussat 900-t missaanniittut pineqarput.

Qaqqap innermik anitsineranit arsakut kangimut aamma kangimut'kujammut tingittussaassasut DR-ip nittartagaani oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq