Islandimi qaqqap innermik anitsisup qullaatsitai Danmarkimi ajornartorsiutaajunnaaraluartut, Danmarkillu qulaani silaannaq ajornartorsiorfiujunnaaraluarpalluunniit, timmisartumik angallassineq sapaatip-akunnera ataaseq qaangiuppat aatsaat nalinginnaaleqqissaaq. Aviisip BT-p nittartagaani tamanna allaaserineqarpoq.
Københavnimi Mittarfimmi tusagassiisartoq, Søren Hedegaard Nielsen, taama naliliivoq.
- Danmarkip qulaani silaannaap ammaqqinnissaa matuneqarneraniit ajornakusoornerussasoq ilisimajuarsimavarput. Timmisartuutileqatigiiffiit assigiinngitsut timmisartuutaat sumi tamaani uninngapput, taamaammat sullittoqaqaaq, timmisartumillu angallanneq sapaatip-akunnera ataaseq immaqa qaangiuppat nalinginnaaleqqissaaq, Søren Hedegaard Nielsen oqarpoq.
- Ullormut timmisartuussisarnitta pingajorarterutaat ullumikkut angumerissagunarpavut, taamaammat timmisartuutileqatigiiffiit timmisartunik aqagu amigaateqassapput, Søren Hedegaard Nielsen aviisimut BT-mut oqarpoq.