Timmisartut kinguaattoorneri peqqutaallutik B-67 suli Ilulissanut anngutinngillaq
Isikkamik arsaalluni unammersuarneq Ilulissani ullummikkut aallartippoq. Nuumminngaanneersulli B-67 suli Ilulissanut apissinngillat. Tamannalu silamik peqquteqartoq B-67-ip aqutsisuat Patrick Frederiksenip KNR-mut oqarpoq nangillunilu..
- Sila peqqutaalluni aallarsinnaanngilagut, Nuuk putserami ilulissanilu aamma pujorluni, taamaakkaluartorli ilagut qulingiluat ullumikkut aallarsinnaapput sinnerilu aqagu aallarsinnaassallutik.
Ataasinngorneq 8. august:
Nal 15.00 IT-79 - G-44
Nal 17.00 K-33 - SAK
Nal 19.00 Nagdlúnguak - UB-83
Marlunngorneq 9. august:
Nal 13.00 IT-79 - K-33
Nal 15.00 B-67 - UB-83
Nal 17.00 G-44 - SAK
Nal 19.00 Nagdlúnguak - T-41
Pingasunngorneq 10. august:
Nal 13.00 IT-79 - SAK
Nal 15.00 UB-83 - T-41
Nal 17.00 G-44 - K-33
Nal 19.00 Nagdlúnguak - B-67
Sisamanngorneq 11. august
Nal 13.00 B-67 - T-41
Tallimanngorneq 12. august
Semifinalerfik
Arfininngorneq 13. august
Finalerfik
Iligiit ullumi unammeqqaartussaagaluartut KAK-p aaqqissuisuisa ataatsimiinnerisa kingorna B-67-ip unamminissaralua sisamanngornermut nuutsinneqarpoq.
AAMMA ATUARUK Arsaannermi GM angallannermi ajornartoornermit eqqugaasoq
- Ullumikkut unammisassaraluagut sisamanngorpat unammassavagut, Taamaalilluta eqqissisimaarfissaraluatsinni unammissaagut, Patrick Frederiksen oqarpoq.
Ullumikkut apuutinngitsoornertik ajuusaarutigigaluarlugu piareersimaffigisimagitsik Patrick Frederiksenip oqaatigaa.
Kinguaattoortut ilaqutseripput
Kinguaatorneq annerusumik kinguneqanngikkaluartoq arsartartoqatigiit Nuummi utaqqikatapput.
- Soorunami ajuusaarnaraluarpoq, aallaqqaataaniit peqataarusukkaluaratta. Kisianni tassa allatut ajornaqaaq angalaniarneq ajornakusoorsinnaasarpoq. Allanngoriasaartoqarsinnaanera piareersimaffigisariaqarpoq nalequssarfissaallunilu, Patrick Frederiksen oqarpoq.
B-67 aallanngitsooramik eqqissisimaarput ilaquttatillu ilagalugit, aallariataarnissaminnulli piareersimapput.
- Ilaquttagut ilagerujoorpagut eqqissisimaarluta angerlarsimalluta, ilagut ippassaq nereqatigipput kisianni ilaqutserineruvugut, neriuuteqarpugulli aallariataarnissatsinnullu piareersimaannavippugut.
Apuutinngitsuussagaluarunik ajorsartutut nalilerneqassapput
Sila kisimi aaliangiisuummat B-67-ip unammisartui kingulliit aqagu apuutinngitsuussagaluarpata unammiallu unammingitsoorpata arsartartoqatigiit unamminermi ajorsartutut nalilerneqassapput.
- Taamaattoqassagaluarpat semifinalemut anngunnissamut periarfissarput annikillissaaq tamanna neriuutiginanngeqaaq. Patrick Frederiksen oqarpoq.
Pilersaarulli allanngoqqinngippat B-67 aqagu unamminissaminnut piareersimapput.
Angutit isikkamik arsaallutik Ilulissani unammersuarneranit unamminerit tamarmik KNR tv-kkut radiokkullu toqqaannartumik aallakaatinneqassapput,