Timmisartup motooriata aseqqui Sermersuarmi nassaarineqartut

Timmisartup motooriata ilaa 150 kiilumik oqimaassuseqartoq Nunatta kujataani Sermersuarmi nassaarineqarlunilu aaneqarpoq. Motoorip ilaa Air Francep timmisartuutaanit 2017-imi septembarimi ajutoortumeersuuvoq.

Air Francep timmisartuutaani 66-mi timmisartuussisartoq Canadami mittarfimmut Goose Bay Airportimut, Vâlimiittumut, septembarip 30-anni 2017-imi pinasuartumik minniartariaqarsimavoq.

Timmisartoq Nunatta silaannaani Paamiunit 150 kilometerinik kujammut ungasitsigisumiitsilluni motoriata qalerperliup ilaa katammat pinasuartumik mittariaqarnissaq piumasarineqarpoq.

Timmisartulli aseqqukup motoriata ilaa Sermersuarmi apummit matoorunneqaqqalluareersoq, Danmarkimi Nunatsinnilu Ujarassiuut misissuisoqarfianit, GEUS-imit immikkut ilisimasallit nassaaraat.

AAMMA ATUARUK Nukappiaraq 10 kilometerisut qutsitsigisumi inunngortoq

Nunatsinni motoorip ilaanik ujaasinerup aallartinneranit sapaatit akunneri 13-init qaangiuttut nassaarineqartoq GEUS-ip ilisimatitsissutigaa. 

- Sermersuarmi sermip quppaani pisuinnarluni, qamutillit robotillu atorlugit ujaasisoqarpoq. Ujaasinermik suliaqarneq unnukkut nannullu aarlerinarneranni aamma ingerlanneqartartoq, GEUS-imi ilisimatooq ujaasinermilu siuttuusoq, Ken Mankoff oqarpoq.

GEUS-ip timmisartup aseqqukujuinik ujaasinissaanik danskit franskillu ajunaarnernut ataatsimiititaliarsui suliakkiisuupput.

GEUS franskit silaannarmut tunngasumik misissuisarfianit, ONERA-mit ilaatigut ikiorneqarpoq, taakkulu sumiiffik motoorip ilaanik katatsiffiusoq qulaallugu timmisartorlutik sumiissusilersinnaasimavaat.

AAMMA ATUARUK Camp Centuryip radarinik misissuiffigineqarnera GEUS-ip saqqummiukkaa

GEUS-imi sulisut Sermersuarmut angalanerit sisamaanni motoorip ilaa amigaataasoq 150 kiilumik oqimaassuseqartoq aputip 4 meterip qallersimasaa sermillu qupparpassuaniittoq qaqippaat.

- Timmisartup motooriata ilaata amigaataasup nassaarinissaa angerlaannissaalu peqataasorpassuit piginnaanillit ikiortigalugit iluatsinneqarpoq, Ken Mankoff oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat