Claus Hjort: Timmisartunik malersuutinik Kalaallit Nunaanni inissiisoqassappat immikkut pisiarineqassapput
![](/sites/default/files/styles/image_934x467/public/article_images/claus_hjort_frederikse_foto_stig_stasig.jpg?itok=N-iuOcRp)
Danskit illersornissamut ministeriata Claus Hjort Frederiksenip (V) aviisimi Berlingskemi ullumi ataasinngornermi saqqummersumi oqaatigaa danskit sakkutuuisa timmisartuutaannik malersuutinik nunatsinni inissiisoqarnissaa siunissami pisariaqalersinnaasoq.
Timmisartut sorsuutit Ruslandimeersut nunatta silaannartaanut appakaatissagaluarpata tamatuma naalagaaffeqatigiinnit iliuuseqarfigineqarsinnaassannginnera ministerip ernumassutigaa.
Taamatullu upalungaarsimasuutitaqarnermi timmisartut malersuutit ikinnerpaamik sisamat pisariaqartinneqassapput, taakkulu pigeriikkanit immikkoortinneqarsinnaassanngillat, Claus Hjort Frederiksenillu Ritzauimit apersorneqarluni oqaatigaa nutaanik pisisoqartariaqassasoq.
- Kalaallit Nunaata silaannartaa russinit uteqqiattumik appakaaffigineqartalissagaluarpat timmisartunik nutaanik pisisariaqalersinnaavugut, ministeri oqarpoq.
Apeqqut: Timmisartut nutaat qanoq aningaasalersorneqassappat?
- Pisarnitsitut. Akileraartartut aningaasaataannik.
Apeqqut: Illersornissamut qullersaqarfiup nammineq aningaasaataanit imaluunniit aningaasaleeqqinnikkut?
- Kalaallit Nunaanni timmisartunik malersuutinik upalungaarsimasuutitaqarnissaq pisariaqalissagaluarpat illersornissaq pillugu isumaqatigiissuteqartut tamanna oqaluuserisariaqassavaat.
AAMMA ATUARUK Timmisartut malersuutit Kalaallit Nunaanni pisariaqartinneqalersinnaapput
Apeqqut: Timmisartut Illersornissamut qullersaqarfiup suliassanut allanut atugaanit nuussisoqarnissaa isumaliutigineqanngila?
- Naagga, immikkut pisiarineqartariaqassapput.
Timmisartunik malersuutinik Amerikameersunik F-35-nik 27-inik 66 milliardit koruuninik akilinnik pisinissaq Folketingimi amerlanerussuteqartut qanittukkut aalajangerpaat.
Timmisartorli ataaseq qanoq akeqassanersoq naatsorsoruminaappoq.
Claus Hjort Frederiksenili naapertorlugu timmisartoq ataaseq 750 millionit koruunit missaannik akeqassaaq.
Timmisartunillu upalungaarsimatitanik sisamanik nunatsinni inissiinissaq taamaalilluni ikinnerpaamik 3 milliardit koruuninik akeqassaaq, saniatigullu aamma nunami atortorissaarutinut, timmisartunik inissiisarfinnut allanullu aningaasartuuterpassuaqassaaq.
Apeqqut: Ataatsimut qanoq akeqassappat?
- Illunik ilusilersuineq tamakkununngalu aningaasartuutaasartut immikkut ilisimasaqarfiginngilakka.
- Oqaatigissavarali Danmarkip silaannartaata illersornissaa akilissallugu pisussaaffigigatsigu, taamaammat pisariaqalissappat aningaasassarsiuuttariaqassavarput, Claus Hjort Frederiksen taama oqarpoq.
Timmisartunillu upalungaarsimatitat sakkutooqarfinni pioreersuni, Kangerlussuarmi Pituffimmiluunniit, inissinneqarsinnaassasorai.
/ritzau/