Timmisartunik attartortitsisarneq isertitsilluartoq
Air Greenlandip timmisartunik attartortitsiviata isertitai 2011-imi sinneqartooruteqaataanerpaasut, timmisartuussiviup ullumi nalunaarutigaa.
Nunatsinni uuliasiornerup aatsitassarsiornerullu saniatigut Ilulissat eqqaani Paakitsumi erngup nukissiorfiliorneq isertitaqarnerulernermik kinguneqartoq Air Greenlandimit oqaatigineqarpoq.
Timmisartunik attartortitsisarfiup 2011-imi aatsaat taama atorneqartigineranik timmisartup DASH-7-ip minnerunngitsumillu qulimiguullit AS 350-it timmisartuussisinnaanerisa 96 procentii atorneqarsimaneri aatsaat taama isertitaqartiginermut peqqutaapput.
Tassa naak Air Greenlandimut ilaasut naliginnaasut unammillerneqarnerup kingunerisaanik 2011-imi ikilerialaarsimagaluartut, naallu orsussaq akitsoriapilooraluartoq Air Greenland 2011-imi aatsaat taama isertitaqartigaaq.
- Angusavut tamakkiisumik isigissagaanni, taava tulluusimaarutissaqarluta misigisinnaalluarpugut. Timmisartortitseqatigiiffimmi sulisut kiffartuussagut ajunngitsumik sullinniarlugit ulapinnerusimapput, Air Greenlandip siulersuisuini siulittaasoq Jens Wittrup Willumsen naatsorsuutit ukiumoortut pillugit taama oqaaseqarpoq.
