Timmisartumut ilaasussat Iqalunnit angerlaqqinnissartik namminneq aqqutissarsiussasut
Paninnguaq Boassen suleqatinilu Iqalunnut suliartorlutik sapaatip akunnerata siuliani aallarput.
Taanna aallannginnermini angerlamut uteqqinnissaminnut aqagumut inniminniivoq. Taannalu Air Greenlandimut ilaalluni Nuummut timmisartumik toqqaannartumut ilaasussaagaluarpoq.
Air Greenlandilli Nuup Iqaluillu akornanni ilaasussakippallaarnera pissutigalugu aqqut apriilip qaammataa tamaat matuaa. Paninnguaq Boassenimut ilaasussanullu allanut nalunaarut malillugu angerlarnissartik namminneq isumagissavaat.
- SMS pissarsiarisarput eqqaassanngikkaanni allatigut attavigineqanngilagut. Billettip akia tamaat utertinniarpaat, maanngaanniilli ingerlaqqinnissarput nammineq isumagissavarput, Paninnguaq Boassen oqarpoq.
Ullormiit ullormut unnuiffissarsiortut
Iqalunni akunnittarfiit ulikkaaqqalluinnarnerat pissutigalugu Paninnguaq Boassen peqqinnissaqarfik suliffigisani suleqatigalugu ullormiit ullormut unnuiffissamik ujartuisariaqarput.
- Unnuiffissaqarnersugut aperineqaavinngilagut. Susoqanngiivillunilu.
Taamaammat Air Greenland suliami matumani akisussaaffimmik tigusisariaqarsoraa.
- Angalaneq akisuvoq, isumaqarpunga aningaasartuutit arlaatigut matussuserneqartariaqarput. Akisussaaffimmik soorunami tigusissapput nunatsinnullu qanoq uteqqinnissarput qulakkeerlugu, taanna oqarpoq.
Air Greenlandip Nuummiit Iqalunnut apriilip aappaanit oktobarip 22-ata tungaanut timmisartukkut angalaffissat nittartakkami ussassaarutigai. Timmisartumillu apriilimi tassani angalanissamut periarfissaq allaanerusoq Paninnguaq Boassenimut pissutsit takutippaat.
Paninnguaq Boassen suleqatinilu qanoq ilillutik angerlassanersut suli ilisimaneqanngilaq.
KNR-ip Air Greenland tamanna pillugu paasiniaaffigaa. Air Greenlandilli suli uterfiginngilaatigut.
