Timmisartortartut taperserneqariaannaapput

Danmarkimi kattuffiit annersaata 3F-ip Kastrupimi immikkoortortaqarfiata timmisartortartut suliumajunnaartut taperserlugit, januaarip qulingiluaannit suliumajunnaaqataaniartoq, Sermitsiami ullumi saqqummersumi allaaserineqarpoq.

Kattuffissuup taassuma ilaasortai ilaatigut tassaapput Kastrupimi mittarfissuarmi biilinik ingerlatsisut, tapersersuillutillu suliumajunnaassagunik, Air Greenlandip timmisartuinik orsersuiumajunnaassapput nerisassanillu tunniussiumajunnaassallutik.

- Timmisartortitseqatigiiffiup timmisartortartunik mattussinermigut sorsunnissaq siunniussimavaa. Timmisartortartullu illersorniarlugit taamatut iliuuseqalersaarpugut. Taamaalilluni Kastrupimi mittarfissuarmi Air Greenlandimik sullissinerit eqqugaassasut, 3F-imi isumaqatigiinniartartuneersoq Henrik Berlau Sermitsiamut oqarpoq.

Air Greenlandimit oqaatigineqarpoq, taamatut tapersersuilluni suliumajunnaarneq sunniuteqarnavianngitsoq.

- Inuit tamakku timmisartutsinnik sullissisarput. Isumaqatigiissuteqartoqanngippalli qanorluunniit pisoqaraluarpat, timmisartut nunamiiginnassapput, tassami timmisartortartut timmisartunilu saqisut mattunneqartussaammata, Air Greenlandimi sulisunut pisortaq Mads B. Christensen Sermitsiamut oqarpoq.

Timmisartortartut akissarsiaat allanngortinngikkaluarlugit sulinerusalernissaat isumaqatigiinniarnerni Air Greenlandimit piumasarineqarpoq, tamannalu timmisartortartunit itigartinneqarluni. Illuatungeriit januaarip sisamaanni naapeqqinniarlutik isumaqatigiissimapput.