Timmisartoq Istanbulimut minniarnermini uppikartoq: 120-t aqqunartitertut
Timmisartoq pingasununngorluni napisimasoq timmisartullu qingaa aseruissimasoq immiussani takuneqarsinnaavoq, aviisi ullormut saqqummersitsisartoq, Hurriyet allappoq.
Timmisartumi ilaasut timmisartup suluusaata aammaatigu timmisartullu napiffiatigut qimagussortinneqarput. Ilaasut ilarpassuit nammineerlutik aniapput.
Ilaasut 120-t ajutoornermi aqqunartitertut, atorfilik AFP-mut oqarpoq.
Istanbulimi guvernørip, Ali Yerlikayamip siusinnerusukkut 52-it ikilerneraraluarpai.
Taassumalu ikilerneqarsimasut Istanbulimi napparsimmaviliaanneqarsimanerlugit.
Tyrkiami tusagassiorfiit timmisartumi aquttut, tykiamioq korea kujallermiorlu – aqqunartitingaatsiarsimasut oqaatigaat.
Meeqqat aqqaneq-marluk ilaasut ilagaat.
Ajunaartoqanngitsoq
Tyrkiami angallannermut ministerip, Mehmet Cahit Turhanip timmisartumi ajutoornermi ajunaartoqannginnerarpaa.
- Ilaasut ilaat aqqunartiterput, ministeri oqarpoq.
Taassuma oqarnera naapertorlugu ajutoornermi timmisartup motoria suluusaata aappaata ataaniittoq ikuallalersimavoq.
Qatserisartorpassuit timmisartumut aserorsimaqisumukartinneqarput, ikuallanneralu pingasunngornermi unnukkut qaminneqartoq, tyrkiamiut tusagassiorfiisa nalunaarutigaat.
Mittarfik, Istanbulimiittoq ajutoortoqarnera pissutigalugu matuneqarpoq.
Nunap iluani timmisartuussisartoq Pegasus Airlinesimeersoq turkiap kitaani illoqarfimmit Izmirimik sialussuaartoq tikikkiartorsimasoq, tv-qarfik, NTV, timmisartup ikuallanneranik takutitsisoq nalunaaruteqarpoq.
Timmisartumi 177-inik ilaasoqarpoq. TV-qarfik, NTV taama nalunaaruteqartoq CNNTurkip oqaatigaa.
Timmisartup mittarfimmi silliannerani masattumut sakkortuumik minnera ajutoornermut pissutaatinneqarpoq.
Pegasusip timmisartuutaa alla mittarfimmi tassani januaarimi aamma ajutoorpoq. Timmisartoq taanna De Forende Arabiske Emiraterinik tikittiartortuuvoq, tassanilu ilaasut 164-iupput, ajoqusertoqaranilu.
Pegasus timmisartuutileqatigiiffittut ukiuni 20-ni atuuppoq, taannalu 83-inik timmisartuuteqarpoq, taakkunanngalu 47-t Boeingimeersuupput 36-llu Airbusiullutik.
/ritzau/AFP