Timmisartoq Airbusiusoq nakkartoq
Tyskit timmisartuat taanna Barcelonamit Düsseldorffimut ingerlaartilluni nakkarpoq.
Timmisartumi issimasut 148-uupput. Tassaasut timmisartumi aquttut marluk timmisartumi saqisut sisamat aamma ilaasut 142-t.
Præsident Francois Hollandep Franskit tv-atigut pisoq siullermik oqaaseqarfigigamiuk oqaatigaa, qaqqani Alpini annaassiniartut ajunaarnermi annattoqarsimanissaa ilimaginngikkaat.
Tyskit tv-qarfiata ARD-p Parisimi ilanngutassiortuata oqaatigaa, timmisartup nakkarnissaa sioqqullugu timmisartumi aquttup kalerrisaarinera, Franskit oqartussaasuisa uppernarsarsimagaat.
Timmisartup aseqqukuinik nassaartoqarnera, Frankrigimi nunami namminermi ministeeriaqarfiup uppernarsarpaa.
Timmisartoq illoqarfiup Digne-les-Bains-ip eqqaani nakkarsimavoq.
Paasissutissat siulliit naapertorlugit timmisartoq nakkartoq Tysklandimi akikitsumik angalatitsisartunit Germanwingisimit pigineqarpoq. Timmisartuutileqatigiiffik taanna Tyskit timmisartuutileqatigiiffiata Lufthansap pigisaraa.
Timmisartuutileqatigiiffimmit oqaatigineqarpoq, qanorpiaq pisoqarsimanersoq suli oqaatigisinnaanngikkitsik.
Danmarkip Berlinimi aallartitaqarfiata ilaasut qallunaartaqarnersut paasiniarniaraa, Danmarkimi Nunanut allanut tunngasunut ministeeriaqarfiup ilisimatitsissutigaa.