Timigissartarfik Sisimiuni atoqqaarfissiorneqassaaq
Kommunimi atuarfiit, paaqqinnittarfiit innuttaasullu atoqqaartitsinissamut atatillugu borgmesterimit Hermann Berthelsenimit aggersarneqarput.
Kommunip timikkut sungiusaasartua atortorissaarutit assigiinngitsut qanoq atorneqartarnissaannut siunnersuillunilu ilitsersuissaaq. Aamma takkuttunut tamanut kommuni naatitanik nerisassaqartitsissaaq.
- Timigissartarfimmik atoqqaartitsinerup Sisimiuni Nalunnguarfiup eqqaani – Sisimiuni SUKISAARSAARTARFIIT - ineriartortitsinerup kingullersarigallarpaa. Ukiarmanna siusinnerusukkut tatsip eqqaani BMX-ertarfik, nerriviit angisuut issiavittallit, naatsiiviit pisuinnarnullu aqqut atoqqaartinneqarput. Timigissartarfimmik atoqqaartitsinermik illoqarfimmi timi atorlugu kulturikkut sunngiffimmilu qiterisaqarnissamik suli pitsaanerusumik periarfissiisoqarpoq. Qeqqata Kommunia taama nalunaaruteqarpoq.
Silaannarissumi timigissarnerorusukkaanni atoqqaartitsinermiluunniiit peqataanissannut periarfissaqanngikkaanni, timigissaasartoq ataasinngornermi oktobarip pingajuani nalunaaqutaq 16-17 aamma marlunngornermi oktobarip sisamaani nalunaaqutaq 19-20 sungiusaassaaq.
Unnukkut sungiusarnerit kikkunnut tamanut ammapput, aallarterlaanut, sungiussisimasunut, inuusuttunut utoqqarnullu, kommuni ilisimatitsivoq.
