Timersortarfiit nutarterneqassapput: Aamma allanik sammisaqarfiulissapput

Nunatsinni timersortarfinni arsarpassuit ullut tamaasa timersuutigineqartarput. Isikkamik arsaatit, sulorarnerit nerrivimmilu arsaararnerit. Timersortarfinnili arsarluni timersornerit kisimik timersuutaajunnaassapput, tassami qitinneq, kivittaarineq immaqalu skateborderneq periarfissaalissapput.

Lokale og Anlægsfondenip nunatsinni timersortarfippaaluit nutarterniarpai.

Timersortarfippassuit nutartigassaapput, iluarsartuussinerillu iluatsillugit allanngortiterisinnaaneq periarfissaavoq, tamaalilluni timersuutinik allanik aallussisoqarsinnaanngorluni.

Kommunit tamarmik nutarterinissaminnut ikiorneqarsinnaasut

Timersortarfiit timersorfiuunnaratik allanik aamma sunngiffimmi sammisassaqartitsinermut ukioq kaajallallugu atorneqarluarsinnaasut, Lokale og Anlægsfonden isumaqarpoq.

- Inuusuttut toqqissisimanissamik pisariaqartitsipput, timersuutaanngikkaluanik qasujaallisarnerunngikkaluanilluunniit sammisaqarusuttartuullutik, Lokal Anlægfondenimi ineriartortitsinermi siunnersorti, Jakob Færch, oqarpoq.

Nunatsinni kommuunit tallimaasut tamarmik suliniummut suleqatiserineqarput, kommunillu timersortarfinnik nutarterinissaminnut Lokale og Anlægfondenimit ikiorneqarsinnaassallutik.

Nutarterineq siulleq Kommune Kujallermi aallartinneqareerpoq, Qaqortumi timersortarfik nutarterneqarluni.

Pinngortitaq timersortarfimmi nutartikkami ilaassaaq

'Qaqortumi Timersortarfik'-up nutarterneqarnissaanut bormesteri Kiista P. Isaksen arlalinnik kissaateqarpoq.

- Katersuuffiusinnaasumik ataatsimoorfiusinnaasumillu ornittagaqarnissarput pingaaruteqarpoq. Igaqatigiinnerusinnaavoq, silameeqatigiinnerusinnaavoq timersoqatigiinnerusinnaalluniluunniit. Sulerisinnaaneq killeqanngitsoq isumaqarpunga.

- Pinngortitaq ulluinnatsinni initoorujussuuvoq, taamaammat suliniummi matumani aamma taamaattariaqarpoq, Kiista P. Isaksen oqarpoq.