Timersornikkut peqqinnissakkullu maligassiuisut arfininngornermi nersorneqalersut
Maren-Louise Poulsen aamma Angajo Lennert Sandgreen nunatsinni timersornikkut peqqinnissakkullu ilungersuuteqarlutik suliniartartunut aamma maligassiuisunut nersorinninnissamut aqagu arfininngornermi unnukkut tikilluaqqusissapput. Aliikkusersuiutigaluni nersorinninnissami ilaatigut Mike Thomsen, Jim Milne, Josef Josefsen allarpassuillu akunniliillutik aliikkusersuisassapput.
Nersorinnissutissat:
- Paarisa timigissartarnermik siuarsaasimasunik nersornaasiissamaarami, ukioq manna Atuarfik eqeersimaartoq, Suliffeqarfik eqeersimaartoq kiisalu Innuttaasoq eqeersimaartumik nersornaasiissamaarpoq.
- Kalaallit Nunaanni Timersoqatigiit Kattuffiat Faxe Kondi suleqatigalugu ukioq manna Timersullammammik, Sungiusaasutsialammik kiisalu Siulersuillammammik toqqaassapput.
- Elite Sport Greenland Grønlandsbankimik SparInvestimillu suleqateqarluni ukioq manna Timersornermi takutitsilluarnerpaaq kiisalu Piukkunnaatilinnik Ineriartortitsisunik nersornaasiissaaq.
- Kalaallit Nunanni Timersoqatigiit Kattuffiallu Danske Spilillu aamma ukioq manna Ataatsimooqatigiilluarlutik timersortartunik nersornaasiissapput. Inuit aqqanillit toqqarneqarsinnaapput, Kalaallit Nunanni Timersoqatigiit Kattuffiata Feacebookimi qupperneranut iserlutit ajugaatikkusutarnik taaseqataasinnaavutit novemberip ulluisa 15´ata tungaanut.
- Saniatigut nutaaliorluni Kalaallit Nunaanni Timersoqatigiit Kattuffiat Ukioq manna Peqatigiilluarnerpaanik nersornaasiissaartaaq.
Maligassiuisut Showimi, ukiumoortumik pisartoq, timersornerup silarsuaani nersorinniffiusartoq Nuummi Katuami arfininngornermi tallimassaanik ingerlanneqalerpat KNR TV toqqaannartumik aallakaatitsissaaq.
Tassani Paarisa, Kalaallit Nunaanni Timersoqatigiit Kattuffiat aamma Elite Sport Greenlandilu pimoorussillutik timersornerup peqqinnissallu iluini suliniuteqartarsimasunik nersorinnissapput.
AAMMA ATUARUK Elite Sport Greenland persuarsiutigineqartumik nersornaasiisussanngortoq
Paarisa aamma Kalaallit Nunaanni Timersoqatigiit Kattuffiat naapertorlugit Maligassiusut Show Qilusa Festivalimut, tassa Nuup innuttaanik sapaatip akunnera aalatitsereernerminnut, naggataarutaaniarpoq.
- Maligassiuisut Showertitsinikkut inuit timersornikkut peqqinnissakkullu immikkut suliniuteqarsimasutut maluginiagassat immikkut saqqumilaartinniarneqarput tamatsinnut isumassarsititsisuummata, Paarisa aamma Kalaallit Nunaanni Timersoqatigiit Kattuffiat tusagassiuutinut ataatsimoorlutik taama allapput.
KNR TV ersorinninnernit arfininngornermi nalunaaqutaq 20.00-miit 21.30-mut toqqaannartumik aallakaatitsissaaq.
