Timersoqatigiit doping akiorniarpaat
Angutit inuusuttut pingasut Ilulissani eqqartuussivimmi ullumi pineqaatissinneqarput pinerluuteqarsimasunut inissiisarfimmittussatut. Taama pineqaatissinneqarput dopingimut atortunik hashimillu eqqussuisimasutut. Nagdlúnguak maanna suliniuteqarnialerpoq dopingimik hashimillu atuisut meeqqanit inuusuttuaqqanillu nuannaartorineqalinnginnissaat anguniarlugu.
- Pinngitsoorata iliuuseqartariaqarpugut dopingip hashillu timersortartut akornanni ulluinnarsiutaalinnginnerani, Nagdlúnguami siulersuisuni ilaasortaq Leif Mathiesen Løvstrøm KNR-imut oqarpoq.
Nagdlúnguup timersoqatigiiffiit allat ukiortaariitsiarpat ataatsimeeqatiseriniarpai. Taamaasiorniarput meeqqat inuusuttullu sunnerniarlugit.
- Suliassaq kisimiilluta suliarisinnaanngilarput. Timersoqatigiit ataatsimoorlutik suliniartariaqarput aammalu taama pisoqartillugu iliuusissanik aalajangersaaqatigiittariaqarlutik. Aamma erseqqissarusuppara inunnik aalajangersimasunik ajattuinissaq siunertaanngimmat. Pingaarnertut pitsaaliorniarparput taama pisoqaqqinnginnissaa, Leif Mathiesen Løvstrøm oqarpoq.
Timersoqatigiiffiit timersortartullu nalunngilluarpaat hashimik dopingimillu pigisaqarneq atuinerlu inerteqqutaasut. Taakkuninnga atuisut timersornermi peqataaqqusaajunnaarallarsinnaapput.
- Meeqqat inuusuttuaqqallu isiginnittaasiat sunnerniarparput. Hashimik dopingimillu atuisut paasineqaraangata tusagassiutini inuiaqatigiinnilu assut oqallisaasarput. Meeqqat isiginnittaasiat sunnerusupparput tassuuna erseqqissarlugu atornerluisuuneq nuannaartunanngitsuusoq. Assersuutissat nuannersut uagut oqaluttuarerusunneruagut, Leif Mathiesen Løvstrøm oqarpoq.
Angutit inuusuttut marluk qaammatit 14-it pinerluuteqarsimasunut inissiisarfimmiittussanngortinneqarput pingajuallu qaammatini 12-ni pinerluuteqarsimasunut inissiisarfimmiittussanngortinneqarluni. Maanna ulluni 14-ni eqqarsarfissaqarput suliaq naammagittaalliutigissanerlugu.
