Tilluuttartut dommerissaaleqipput
- Meeqqaniit inersimasunut 11-nik ukiulinniit qummut ukiullit peqataassapput. Arfininngorpat tilluunnerit 11-12-ussapput. Oqimaassutsit 40 kiilumiit 90 kiilu sinnerlugu oqimaassusillit unammissapput, Jørgen Boassen oqarpoq.
Tilluunnermi ajugaaniunneq kisimi eqqarsaatigineqanngilaq, aningaasanik katersinissaq aamma siunertarineqarami.
- Unammisitsineq aamma aningaasanik katersuiniarfiussaaq. Dommerinik kursusertitsineqarniassammat. Nunatsinni nammineq dommereqalerniassagutta Danmarkimit pikkorissaasussamik tikisitsisariaqaratta. Jørgen Boassen nassuiaavoq.
Unamminerni aqutsisussanik dommerissanillu pikkorissaasarnissaq siunertaavoq.
- Unammisitsinialeraangatta inuit sisamat dommeriusartussaapput, akissaqartinngilarput ukiumut pingasoriarluta sisamariarlutaluunniit dommerissanik tikisitsisarnissatsinnut, Jørgen Boassen nassuiaavoq.
Unamminermi tilluuttartut 15-nit peqataasussaapput. Ajugaasut periarfissinneqassapput maani nunatsinni imaluunniit Danmarkimi tilluunnernik unammivinnissamut.