Tilluunneq: Frank Madsen pissartanngorniulluni unamminermi ajorsarpoq
Gilleleje Sjællandimiittoq akissarsiutigalugu tilluuttartunut arfininngornermi unnukkut unammiffiuvoq tassanilu kalaallinik sorlaqartoq peqataavoq.
Tassami Frank Madsen Nuummiunik ilaqutalik weltervægtimi pissartaasup qiterutaa pissarsiareriarpaa. Tilluuttut tamarmik suli nikorfasut tilluuffimmi sianeq naggataamik sianerpoq arfineq pingasoriarluni tilluunneq naammassimmat.
AAMMA ATUARUK Grønlandsk bokser har store ambitioner for fremtiden
Oliver Møllenberg Gillelejemeersoq dommerit nalileereerneranni ajugaasutut nalunaarutigineqarpoq.
- Nammineq illoqarfigisaminiinnini iluaqutigivaa dommerinillu ilalersorneqarluni. Tilluulluni timersuut tassa taamaappoq, Frank Madsen KNR-mut oqarpoq.
Akiniaalersaarpoq
Isiginnaariat 400-ut missaanniittut Gillelejemi isiginnaarput. Unammineq kingusinnerusukkut KNR-TV-mi takutinneqassaaq.
Qinngakkut aattoqarlunilu kiaguttoqaqaaq tilluutit atorlugit assersimaneeruttut tilloriarneqaqattaarmata.
- Timiga ippinnarpoq. Aamma ajorsarsimatilluni taamaannartarpoq. Ajugaasimatillunimi annernartut malunnarunnaartaramik, Frank Madsen oqarpoq.
Tilluunnermi ajorsaraluarluni uniinnarnianngilaq. Suli akissarsiutigalugu tilluuttartuni weltervægtimi Danmarkimi pissartatut qiterut pissarsiareriarusuppaa.
- Sungiusaasukka maanna oqaloqatigissavakka sungiusarnerlu allannguallatsissinnaallugu. Akiniaalluuni tilluunnissap piviusunngornissaanut aningaasaliisartunit taperserneqarnissaq apeqqutaalluinnarpoq, Frank Madsen Aarhusimi The Colloseumimi tilluuttartoq oqarpoq.