Tillitanik tuniniaasarneq politiit mianersoqqussutigaat

Qaqortumi Nuummilu tillitanik tuniniaasarneq ajornartorsiutaaqaaq.
Fjernsynit, mobiilit qarasaasiallu akikitsunngorlugit tuniniarneqartarput.
Radionik tuniniaaviit angerlarsimafiillu tillinniarfigineqartarput. Tillitat angerlarsimaffinnut, niuertarfiit qanittuini, taxartartunut imerniartarfinnilu tuniniarneqartartut, Nuummi Qaqortumilu politiit oqarput.

Nuummi tillitanik tuniniaasarneq annertuumik ajornartorsiutaavoq, tillitallu ilaat periarfeerutivinneqartartut Nuummi politiini pigaartuusoq Kasper Berthelsen oqarpoq.

- Niuertarfiit eqqaanni, taxartartunut aamma imerniartarfinni tillitat tuniniarneqartarput.
Taamaammat tillitanik tuniniaasarneq Qaqortumi ajornartorsiutaavoq, kujataani politiini pisortaq Bent Ole Kleist oqarpoq.

Qaqortumi niuertarfinni radionik tuniniaaviusuni tillinniarnerit amerlasuut ukiariarnerani Qaqortup politiini suliarineqarput.

Fjernsynit angisuut ilaatigut 52 tommerinik angissuseqartut angerlarsimaffinni tillineqartarsimapput, Bent Ole Kleist oqarnera malillugu tillineqartut taamak angitigisut kikkunit tamanit takuneqarsinnaagaluarput, taakkualu tunineqartarsimapput akikitsuaranngorlugit, kujataani politiini pisortaq oqarpoq.

- Tuniniarneqartut  akikitsuaranngorlugit tuniniarneqartillugit pasitsattoqartarsinnaagaluarpoq tillitaasimaneranik, kisianni taamaattoqarneq ajorpoq, tunineqartartut imaaginnavipput, tillineqarsimasut utertinneqarnerlu ajortut amerlapput, Bent Ole Kleist oqarpoq.

Tuniniarneqartut akikinnerat pissutigalugu pisiarineqaannartarput
Fjernsyn 500 koruuninik akilerlugu imaluunniit qarasaasiaq nutaavik  akikitsunngorlugit tuniniarneqarpat naaggaarsinnaaneq pigineqarnerusuuppat tillitanik tuniniaaneq pinaveersaarneqarsinnaagaluartoq, Bent Ole Kleist oqarpoq. 

- Aningaasakilliorneq pissutaagunarluni suut tamarmik akikitsut pisiarineqartarput. Tillitanik tuniniaaffigitinnermi ileqqorissaarneq amigaatigineqartoq, kujataani politiini pisortaq Bent Ole Kleist oqarpoq.

Tillitanik pisinermi inatsisitigut kingunerisinnaasai  Bent Ole Kleist ip imatut oqaatigai.

- Tillitanik pisineq pinerluttulerinermik inatsimmik unioqqutitsineruvoq.
Akiilisitsinermik kinguneqarsinnaavoq aamma pinerluttulerinermut inatsimmi unioqqutitsimasutut allassimasuunermik kinguneqarsinnaalluni, Bent Ole Kleist oqarpoq.