Tillinniat sakkortuumik pineqaatissinneqartut
Taama sakkortutigisumik pineqaatissiineq naliginnaasuunngitsoq Namminersorluni Oqartussani tilliniarsimasup aappaata 19-inik ukiullip unnerluussisua Mads Lynge Christiansen oqarpoq.
Tillinniat marluk naliginnaasumit sakkortunerusumik pineqaatissinneqarnissaat unnerluussisup piumasaraa, eqqartuussivimmilu taperserneqarluni.
Tillinniaqataasup aappaa 19-inik ukiulik qaammatini arfinilinni pinerluuteqarsimasunut inissiisarfimmiittussanngorlugu pineqaatissinneqarpoq, aappaalu 23-nik ukiulik qaammatini arfineq-pingasuni pinerluuteqarsimasunut inissiisarfimmiittussanngorlugu pineqaatissinneqarluni.
Tillinniarsimasutut eqqartuunneqartut naliginnaasumik qaammatit marluk sisamallu akornanni sivisussusilimmik pineqaatissinneqarsimasunut inissiisarfimmiittussanngortinneqartarput.
Uanilu suliami suna tunngavilersuutaanersoq 19-inik ukiullip illersuisuata Bjørn Chemnitzip ima nassuiarpaa:
- Tunngavilersuutit ilagivaat pisortat allaffeqarfiini tillinniartoqarsimanera.
Angutit inuusuttut marluk siornatigut qaammatini tallimani pinerluuteqarsimasunut inissiisarfimmiissimanerat unnerluusssisup naliginnaasumit sakkortunermik pineqaatissinneqarnissaannut tunngavilersuutigaa, tassami iperagaanerminnik qaammat ataaseq qaangiutiinnartoq Namminersorluni Oqartussani tilliarnerat pisimammat.
Aamma tunngavilersuutit ilagaat tillinniarneq annertusimammat, tassa Naalakkersuisup Siulittaasuata Kuupik Kleistip allaffiani, Aalisarnermut Piniarnermut Nunalerinermullu naalakkersuisup Ane Hansenip allaffiani, allaffinnilu allani allagaatit sumi tamaani natermiissimammata.
Tillinniarsimasoqatsiaannartoq Naalakkersuisoqarfimmi pisortap Peter Schultzip politiiillu tillinniarsimaneq eqqumiitsutut oqaatigaat, politiillu pinerluffiusumi paasiniaasartut Danmarkimi Kriminal Teknisk Centerimeersut tikisillugit.
Allagaatinik isertukkanik tillittoqarsimaneranik pasilliineq unnerluussisup Mads Lynge Christiansenip ilumuunnginnerarpaa aamma illersuisup Bjørn Chemnitzip oqaatigaa tamatumunnga pasilliinermut uppernarsaatissaqartoqanngitsoq. Tillinniat tassa tillissimavaat pigisat nalillit tuniniarsinnaasatik, soorlu mobiltelefonit.
Angutit marluk inuusuttut pineqaatissinneqarnertik Nunatta Eqqartuussivianut suliassanngorteqqippaat, pineqaatissinneqarsimanertik sakkukillisikkumallugu. 19-inik ukiullip illersuisuata Bjørn Chemnitzip nassuiarpaa sooq suliassanngortitseqqiisoqarsimanersoq:
- Isumaqaratta naliginnaasumik allanik sanilliukkaanni, taamatut inatsisinik unioqqutitsisimasunut allanut, ukua sakkortunerusumik pineqaramik, tillitaasa annertussusaat eqqarsaatigigaanni naliginnaannginnami taama annertutigisumik pineqaatissiineq.
Politiit tillitanik inaarsuinertik naammassisinnaasimanngilaat, tassa suut tillinneqarsimanersut tamarmik ilisimaneqannginnamik, tillitalli nassaarineqartut tassaapput mobiltelefonit tallimat, qarasaasiaq angallattagaq ataaseq eqqumiitsuliallu.
