Nunatsinni politiit juullikkunni ulapinngitsut

Nunatsinni juullikkunni tillinniarnerit ataasiakkaarput angerlarsimaffimmilu eqqissiviilliortitsinerit arlaqaratik, annertuumillu pisoqaranilu tigusarinnittoqanngilaq.

Nuummi Politiini pingaartut pisortaat, Malik Olesen nunatsinni politeeqarfinnit assigiinngitsunit paasissutissarsisartoq taama nalunaaruteqarpoq.

- Nalinginnaasumit ulapinnerusoqanngilaq. Ataatsimut isigalugu juullikkut eqqissisimaarfiulluartorujussuupput, pigaartut pisortaat oqarpoq.

- Tillinniarnerit ataasiakkaarput, taakkulu allanik ilaqassagunartinngilagut aamma tulleriiaartumik tillinniarnerunngillat, Malik Olesen oqarpoq.

Tillinniarnerit sisamat nalunaaarutigineqartut

Juulliaqqami tillinniartoqanngilaq, juullerujussuarmili tillinniarnerit siulliit politiinut nalunaarutigineqarput. Tassa Nuummi atuareernermi ornittakkamut Narsamilu cafémut tillinniarnerit nalunaarutigineqarput.

Juullip aappaani tillinniartoqarneranik aamma nalunaaruteqartoqarpoq. Tamatumuuna Nuummi sullivimmut tillinniartoqartoq, pigaartut pisortaat paasissutissiivoq. Kingullermillu tallimanngornerup unnuaani Qaqortumi pisiniarfimmut Sparimut tillinniartoqarneranik nalunaaruteqartoqarpoq.

Sumiiffinnit assigiinngitsunit suut tillinneqarsimanersut Malik Olesenip oqaatigisinnaanngilaa. Tilliartoqarnerili tamarmik sukumiinerusumik misissuiffigineqartut, pigaartut pisortaata erseqqissaatigaa.

Qaqortumi tallimanngornerup unnuaani tillinniartoqarnerata saniatigut nunatsinni angerlarsimaffinni eqqissiviilliornerit qassiiusut politiinit orniguffigineqarput. Nuummi, Qaqortumi, Paamiuni Nanortalimmilu angerlarsimaffinni eqqissiviilliortitsinerit pillugit nalunaaruteqartoqarpoq.

Politiit angerlarsimaffiit tamarmik orniguffigaat, Malik Olesenilli oqarnera naapertorlugu taakkununnga atatillugu tigusarinnittoqanngilaq.