Tillinniariaraluarnerit arlaqartut Nuummi ajornartorsiutaasut
Nuummi sanaartorfiit pingasut sumiiffimmi ataatsimiittut tillinniariaraluarnernik nalunaaruteqarsimapput. Taama Kalaallit Nunaanni Politiini pigaartut pisortaat ilisimatitsivoq.
Nalunaarutiginninneq siulleq ullaaq arfineq pingasunut qiteqquttoq nalunaarutigineqarpoq.
Pinerluttuliortut Permagreenip containeriinut iserniarsimagaluarput, iluatsinngitsumik. Qatserisuni tillinniariaraluartoqarpoq tamannalu videokkut nakkutilliissummit immiunneqarsimalluni.
Sivitsunngitsoq, nalunaaqutaq 08.43-nngoqqissaarmat, Kujallerpaani sanaartorfimmut tillinniariaraluarnermik politiinut aamma nalunaaruteqartoqarpoq.
Tillinniariaraluarnerup saniatigut sanaartorfimmi qalipaammik aserorterisoqarsimavoq. Tillittoqarsimaneranik politiit suli paasisaqarsimanngitsut ullumi pigaartunut pisortaasoq ilisimatitsivoq.
Maluginiarsiuk
Tillinniariaraluarnerit pingajuat kingullerlu pingasunngornermi ullaakkut qulingiluanngulersoq Nuukullak 8-mi sanaartorfimmit nalunaarutigineqarpoq.
Pinerluttuliortut tamaani aamma tillissimanngillat pigaartulli pisortaata Nuummi innuttaasut maluginiarnissaat innersuussutigaa.
- Ataqatigiissinnaanerat mattussinnaanngilarput, oqarpoq.
Taamaammat aamma isumaqarpoq angerlarsimaffigisaq qimatsinnagu matup parnaarsimanerata misissoqqinnissaa isumassarsiatsialaasoq.
