Saviit akisuut qilalukkat tuugaavinik ipullit tillinniarnerup kinguninngua internetsikkut tunineqarsimapput:
- Namminersorlutik Oqartussanit tillinneqarsimasut ilagigunagaat internetsikkut tuniniarneqartut, ippassaq paasitinneqarpugut, Kasper Berthelsen oqarpoq.
Tillinniat tillitani angummut allamut tunisimavai taassumalu nittartakkakkut tuniniariaraluarsimavai tamannalu paasisaassutigalugu.
- Tillinniarsimasoq tigusarisimallugu, killisiornerani ullumi paasivarput, Kasper Berthelsen oqarpoq.
Politiit paasisaat aallavigalugit angut 33-nik ukiulik kisimiilluni marlunngormat marloriarluni Namminersorlutik Oqartussanut tillinniarsimavoq.
Angutit inuusuttut allat marluk politiinit tigummigallarneqareerput, Namminersorlutik Oqartussanut sapaatit akunneri tallimat matuma siorna tillinniarsimasutut pasineqarlutik. Sulialli taakku marluk imminnut attuumassuteqarpasinngitsut politiit oqaatigaat.
- Manna tikillugu paasisagut aallaavigalugit tillinniat taakku imminnut attuumassuteqanngillat, Kasper Berthelsen oqarpoq.
Tillitanik internetsikkut pisisoq tillitanik pisisimasutut unnerluutigineqarumaartoq, politiit nalunaarutigaat.
Angut 33-nik ukiulik Namminersorlutik Oqartussanut tillinniarsimasutut unnerluutigineqarluni inatsisit tunngaviusut naapertorlugit unnugu arfineq-marlunut killisiorneqassaaq.