Tikeraarluni ilinniartitsitsisartoq: Ingerlatsinermik ilinniartitsineq pitsaanerusinnaavoq
- Ilisimatusarfimmi ilinniartitsinerup qaffasissusia CBS-imut Københavnimiittumut naleqqiukkaanni, taava Ilisimatusarfimmi ilinniartitsinerup pitsaasusia appasippoq. Tamanna qularutissaanngilaq, Mikael Andersen oqarpoq.
Taanna ilatigut Ingerlatsinermut institutttimi ilaatigullu CBS-imi, tassa København-imi niuerneq pillugu ilinniarfissuarmi, aningaasarsiornermut tunngasunik ukiuni arfinilinni ilinniartitsisimavoq.
Mikael Andersenli isumaqanngilaq, ilinniartitsinerup pitsaasusaata appasinneranut ilinniartitsineq immini kisimi pisuusoq. Aamma ilinnialersartut piginnaasaat pitsaanerusinnagaluartut oqarpoq.
- Ajornartorsiut marloqiusaavoq. Oqartoqarsinnaavoq, ilinniartut piumassusertut. Ilumut ilinniarput, amerlasuullu kajumilluarlutik. Kisianni ilinnialernernerminni piginnaasaat assigiinngittaqaat.
Taamaalilluni nalorninarsisarpoq, ajornartorsiutit, ilinniartunut allanut naliginnaasumik itisiliiffigisartakkat, ilumut saqqummiutissanerlugit, immaqaluunniit misilillugu minnerusumik atuagassissanerlugit, ilinniartut amerlanerit taamaalillutik malinnaaniassammata.
Ilinniartitsisut pingasut Århus Universitetimeersut Michael Andersen isumaqatigaat. Taakkua pisortat aqutsineranni periaatsinik 2006-imi 2007-imilu ilinniartitsipput. Ilinniartitsinerminnik ataatsimoorlutik naliliillutik allapput, ingerlatsinermut tunngasunik Danmarkimi universitetini ilinniartitsinermut naleqquttumik pitsaassusilimmik ilinniattitsiniarneq ajornakusoorsimasoq. Taama qaffasissusilimmik ilinniartinnissaannut ilinniartut periaatsit teoriillu ilikkarsimasaat naammanngitsut, ilinniartitsisut Århus Universitetimeersut pingasut allapput.
Taakkuali erseqqissarpaat, isornartorsiuinertik ilinniartunut tunngasuunngimmat. Illuanik ilinniarnerminni pissarsiarisimasaat isornartorsiorpaat.
Isornartorsiuisut pingasut, Århusip Universisitetiani ilinniartitsisuusut, Radioavisimiit oqaaseqartinniaraluaratsigit apersorneqarumanngillat, naliliisimanertilli aalajagiusimallugu.
