Tikaagulliusaaq katersugaasivissuarmut takuniarneqarsinnaalerpoq

Tikaagulliusaaq toqummalli, saarngi katersugaasivissuarmit Statens Naturhistoriske Museumimit salinneqarput, tikaagulliusaallu meterinik 17-inik takitigisup saarngi, niaqutalu saarngi Vejlemut maanna utersimalerput. Saqqummersitsineq tallimanngormat ammarpoq, juunip ulluisa tallimaata tungaanut pissalluni.

Tikaagulliusaaq Vejlep kangerluani tipeqqammat tupinnaannartumik soqutigineqarpoq. Taama soqutigineqartiginera pillugu kalaallit amerlanerit qularnanngitsumik ileqimisaaginnarput, immaqaluunniit quiatsaannarlutik. Tikaagulliusaaq Vallemik sukkanerpaamik atserneqarpoq, vejlemiullu ilaat erinarsuusiorujoq taallugu "Hvalen Valle".

Tikaagulliusaap uumanerani, aamma pilanneqarmat, qallunaarpassuarnit takusarneqarpoq. Aanaveersaasartoq Statens Naturhistoriske Museumimeersoq, tikaagulliusaamik pilattuusoq, Abdi Hedayat, aviisimut Jydske Vestkystenimut oqarpoq, tikaagulliusaamik ukiut 50-it matuma siorna toqusoqarsimasuuppat qallunaat sumilluunniit aggerlutik takuniaasimanavianngikkaluartut.

Arferit pillugit ilisimasaqarluartup, Thyge Jensenip, nittartakkami hvaler.dk-mi aaqqissuisuusup, oqarnera naapertorlugu, arferit illernartutut nunani killerni isigineqalersimapput. Soorlu nersussuit Indiami taama isigineqartut.

Tikaagulliusaaq pineqartoq 130-t 140-llu missaanni utoqqaassuseqarsimavoq, aatsaallu taama utoqqaatigisumik misissuisoqarpoq. Gigteqarlunilu, qimerlui arlallit katigussuussimapput, sanigorsimangaaramilu tonsit arfineq-marluk missaannik oqippallaarsimavoq.