Politikki

Tikaagullittassiissutit sinneruttut tamanut ammaanneqassasut

Nunatta Kitaani tikaagulliit qamutilimmik tuukkartalimmik pisassat 65-it, qoorortoorsornermilu pisassat 14-it kiisalu Kalaallit Nunaata Kangiani tikaagulliit qoorortoorsorluni pisassaq ataaseq septembarip 28-ani suli pisarineqarsimanngillat. Taamaammat pisassiissutigineqartunit sinneruttut tamanut ammaanneqartussanngorput.

Allattoq Simon Uldum -

septembarip 29-at 2016 10:24

Pisassiissutigineqartut tamakkerneqarnissaat qulakkeerniarlugu, pisassiissutinik agguaassinermik gruppi Aalisarnermut, Piniarnermut Nunalerinermullu Naalakkersuisoq suleqatigalugu aalajangiivoq oktobarip pingajuanit atuuttumik tikaagulliit pisassiissutigineqartunit sinneruttut 79-it Kalaallit Nunaata kitaani kommunit sisamaasuni ammaanneqassasut tikaagullillu ataaseq Kalaallit Nunaata Kangiani aqutsiveqarfinnut marlunnut ammaanneqassallutik.

Angallatit taamatullu ataatsimoorluni piniarnermut peqataasut tikaagullinniarnermik ilisimasaqarluartut nalunaarutini piumasaqaatit malillugit marsip aallaqqaataanit novembarip 31-anut piniarsinnaapput.

Piniarneq siulersortimik akuersissummik pigisaqartumik aqunneqassaaq, taassumalu aamma akisussaaffigaa pisap kommunimut najugaqarfigisamut ingerlaannartumik nalunaarutigineqarnissaa. Aalisarnermut, Piniarnermut Nunalerinermullu Naalakkersuisoqarfik taama ilisimatitsivoq.

Tikaagullittassiissutit sinneruttut tamanut ammaanneqassasut

Aamma atuaruk