Tikaagullinnik arfivinnillu pisassiissutaasut piareertut
Pisassiissutit agguaanneqarneri aalisarnermut piniarnermullu naalakkersuisumit Karl-Kristian Krusemit (S) akuerineqarput.
2016-imi Kitaani tikaagullittassat tamakkerlutik 179-iupput. Taakkunanngalu 15-it tassaapput siorna pisarinngitsuukkat ukioq manna pisassiissutinut nuunneqartut.
Pisassiissutigineqartunit 179-iusunit 134-t angallatinut tuukkartalinnik qamutililinnut agguaanneqarput, 45-llu ataatsimoorluni piniarnermut agguaanneqarlutik.
Tunumi tikaagullittasiissutit tamakkerlutik 15-iupput, siorna pisarinngitsuukkat pingasut ukioq mannamut nuunneqarlutik. Taakku ataatsimoorluni piniarneqassapput.
Kitaanut 2016-imi arfiviit sisamat pisassiissutigineqarput, taakkunannga marluk siorna pisarinngitsuukkat ukioq manna pisassiissutinut nuunneqarput.
Piniarnerup isumannaatsumik ingerlanneqarnissaa eqqanaarniarlugu ukiut siuliinitut piumasaqaatinik piumasaqartoqassaaq Namminersorlutik Oqartussat, Kommunit aamma piniartut akornanni suleqatigiilluarnissamik piumasaqartumik, aalisarnermut piniarnermullu naalakkersuisoqarfik taama ilisimatitsivoq.