Tigerrejet ajorisaapput
Tiger- aamma rejersuit angisuut mamarineqartaraluaqaat, suliffissuilli tamakkuleriffiusut Asiami, Afrikami aamma Latinamerikamiittut sussaanngillat.
Tamakkunanimi suut tamarmik atugaapput - meeqqat sulisorineqarneriniit toqutsinernut - taama oqaluttuarpoq Eva Hessel Lundstrøm paasiniaasarfimmiit Danwatchimeersoq.
- Niviarsiaraq qulingiluanik ukioqarluni raajaleriffimmi sulilersimasoq oqaloqatigaarput. Tamakkunani meeqqat ataannartumik akunnerni aqqanilinni sulisarput. Rejerpassuit nunnigunneqaraangasa meeqqat suliartoqquneqartarput, taava ullaamiik unnussuarmut raajanik saliillutik sulerulutsinneqartarput, nerrivitsinnut anngunnissaminnut illinnartuuniassammata.
Danwatch ilaatigut danskit Atuisunut Siunnersuisoqatigiivi suleqatigalugit tamakkunannga tukertitsiviit Thailandimiittut Equadorimiittullu alakkartersimavaat. Danmarkimi nunatsinnilu raajarujussuit tunineqartartut 8 procentii nunani taakkunaneersuupput. Taakkunani takusaat isornarluinnartuusimapput.
Rejerujussuarnik suliffissuit Equadorimi sinerissap qanittuani najugallit inuunerat aserorsimavaat. Rejenimmi tukertitsiviit sillimaniarnermut ungaluliortitersimapput, taamaalillugit aalisartut sinerissamukarnaveerlugit. Ungalullu assersuutit naliginnaasuunngillat. Kallerup inneranimmi sakkortoorujussuarmik sarfaqarput, aalisartup orlulluni ungalumut attuuttooruni ingerlaannaq toqussaaq.
Tamakkorpiaat pissutigalugit, niuvertarfissuit Sverigimiittut kiattup raajaat tamaasa pisiniarfinniit piiarsimavaat. Danmarkimili maanilu suli pisiassaapput.
COOP-Danmarkip raajarujussuit Thailandimeersut Equadorimeersullu nioqqutigiumajunnaarsimavai, sulili Kinameersunik nioqquteqarluni, naak siusinnerusukkulli Kinami tunisassiortut Greenpeacemiit FN-imiillu isornartorsiorneqarsimagaluartut.
Danskit atuisartut siunnersuisoqatigiianneersup Camilla Udsenip kiattup raajarujussuinik tukertitsiviinik isornartorsiuisut isumaqatigai.
Ilaatigullu issittup imartaaneersunut soorlu raajanut nunatsinneersunut innersuussilluni, tamakkumi nungusaataanngitsumik piniarneqarmata kiattuneersunut taarsiullugit atorluarneqarsinnaammata.
/DR/
