Misileraataasimasoq: Eqqartuussivimmi suliarinissaa tulluanngilaq
Kalaallit meeqqat 1951-mi misileraataallutik Danmarkiliartinneqartut, aningaasanik taarsiivigineqarnissamik danskit naalagaaffiannut piumasaqarnerat naalagaaffiup itigartitsissutigaa.
Isumaginninnermut ministerip, Astrid Krag-ip, kalaallit meeqqat misileraataallutik Danmarkimut 1951-imi aallartinneqartut, aningaasanik tamarmik immikkut 250.000 koruuninik, danskit naalagaaffiannut taarsiiffigeqqunerat itigartitsissutigaa.
Meeqqat misileraataasut
Meeqqat 22-t misiliummik nunatsinnit Danmarkimut 1951-imi aallartinneqarput.
Taakku ineriartortitsiniarnermut misileraanermi qitiupput, meeqqat danskiunerulernissaat nunatsinnullu uterunik maligassiusunngornissaat anguniagaasimavoq.
Meeqqalli angerlaramik oqaatsitik puigorsimavaat ilaquttaminnilu najugaqarsinnaatinneqaratik, Nuummi meeqqat angerlarsimaffiannut inissinneqarput.
Meeqqanit taakkunannga 22-nit arfinillit suli uumapput. Taakkulu 80-it missaannik ukioqarput.
Tamanna misileraataasimasut eqqartuussissuserisuata tupaallaatigaa.
- Sooq itigartitsinerminnut tunngavilersuuteqannginnerat tupaallaatigilaarpara. Soorluli eqqartuussivimmukartigatik isummerfigerusunngikkaat. Isummerfiginagu itigarteriarlugulu suliaq eqqartuussivimmut innersuummassuk ajorluinnartutut isigaara, Mads Pramming KNR-mut oqarpoq.
Pakatsisoq
Taassuma taamani meeraasuni maanna sinneruttut arfiniliusut, taarsiiffigineqarnissaannik piumasaqaat, statsministereqarfimmut novembarimi nassiuppaa. Itigarneq misileraataasimasut ilaata anniaraa.
- Danskit naalagaaffiata eqqartuussivimmi suliassanngortitsinermik nassatalimmik kinguartitsinera pakatsissutigaara. Tamatta utoqqaavugut arfiniliinnanngornikuullutalu. Taava 250.000 koruunit suuppat? Suunngillat, Kristine Heinesen KNR-mut oqarpoq.
Ministeriunerup Mette Frederiksenip kalaallit 22-t misileraanermut peqataatinneqartut allakkatigut siorna utoqqatserfigai. Tamannali naammagineqanngilaq.
- Utoqqatsiinnarneq akeqanngilaq. Ilumoorullugu utoqqatserneq aningaasanik taarsiinermik takutinneqartarpoq. Ilumoorussinerelu taama ittoq sullitama amigaatigaat. Aningaasarpassuassarsinissaq pineqanngilaq. Ajunngitsumilliuna inuuleqqinnissamut utoqqatserneq pitsaasoq pineqartoq, Mads Pramming oqarpoq.
Heinesen: Sukataaginnassaagut
Misileraataasimasut piumasamittut aningaasannassinnaanerat suli qulanarnarpoq. Taamaakkaluartoq suli tunniutiinnartoqanngilaq.
- Maannakkoqqinnaaq isumassaarusimaarpunga. Kisianni sukataaginnassaagut, Kristine Heinesen oqarpoq.
KNR-p danskit isumaginninnermut ministereqarfiat attavigaa. Taakkua eqqartuussivimmut sassaqqusissummik suli tigusaqannginnamik isummerusunngillat.
Taakkununnga apersuinissaq aamma iluatsinngilaq. Allakkatigulli ima akipput:
- Isumaginninnermut utoqqarnullu ministeriap eqqartuussivimmut sassaqqusissummik tigusaqarnissani utaqqillugu paassissutissiissutigisinnaavaa. Taanna tiguneqarpat, ministeriap taarsiiffigeqqunermut apeqqut qanoq isummerfigissallugu nalilerumaarpaa.
Meeqqat taamani angajoqqaatik qimallugit danskit oqaasiinik ilinniariartortinneqartut, sisamanit qulingiluanut ukioqarput.
Kalaallit Nunaata taamani ineriartorneranut iluaqutaallutik, danskisuinnaq oqalunnissaat siunertaavoq. Taakkua Nuummi børnehjemmimut tamatuma kingorna inissinneqarput, kalaallisullu oqaloqqusaanatik.