Canadami ministeriusimasoq: TB pillugu suliniuteqarneq naammanngilaq
Canadami nunap inoqqaavisa akornanni tuberkulosertoqarnerup 2025-mi affaannanngortinneqarsimanissaanut Canadami naalakkersuisut pilersaarutigigaat, tuberkulosernerullu 2030-mi nungutivinneqarsimanissaa aamma pilersaarutaasoq, naggueqatigiit Inuit siuttuata Natan Obedip, Canadami nunap inoqqaavinut tunngasunut 2018-imi ministeri peqatigalugu taamanikkut nalunaarutigaa.
Canadami naalakkersuisut tamanna pillugu 140 millionit koruuninik immikkoortitsivoq.
TB-p nunap inoqqaavisa akornanni siaruaassimanerujussua, ministerip Jane Philpottip taamanikkut ernumagaa, TB-mmi naggueqatigiit Inuit akornanni atugaanera Canadap sinnerani innuttaasunut naleqqiullugu 300-riaammik annertunerummat.
Jane Philpott maanna ministeriujunnaareerpoq, CBC Newsimulli sapaatip-akunnerata massuma ingerlanerani oqaatigaa TB akiorniarlugu ukiuni kingullerni marlunni annerusumik pisoqarsimanngitsoq, akiorniarneqarnissaa aallartimmalli TB-rtut amerlassusaat taamaaginnartoq.
Philpott: Aningaasaliisoqarnerussaaq
Inuit aqqaneq-marluk, Nunavummi TB-mit ukiut kingulliit qulit ingerlaneranni toqquteqarsimasut Jane Philpottip oqaatigaa, TB-rnerullu issittumi nappaataanerujussua ajornartorsiutaasorujussuusoq.
- Eqqumaffiginerusariaqarparput, akiorniarneqarnissaanullu aningaasaliinerusariaqarluta, Philpott CBC-mut oqarpoq.
AAMMA ATUARUK Sakialluutip akiorniarneqarnera Canadap sakkortusaqqinniaraa
Nunavummi naalakkersuisut TB-mut katsorsaarnermi ukiumut 50 millionit koruuninik maanna aningaasaliisarput. TB-llu akiorniarneqarnissaanut nunap immikkoortuanut pilersaarummik Nunavummi peqqinnissaqarfimmit ineriartortitsisoqaleruttorpoq, upernaaq manna taanna piareersimassalluni.
Naallu tamanna TB-p siaruaannissaanut immaqa pakkersimaartitsilissagunaraluartoq, TB-p nappaalassutigineqarneranut pissutaanerpaajusut, tassa inissiat pitsaavallaanngitsut, amerlasuunillu ataatsikkut najugaqarfigineqartut, inuussutissanik pilersuineq naammanngitsoq, Nunavummilu suliffissaaleqinerujussuup iliuuseqarfigineqarnissaat ajornakusoortorujussuusoq, Nunavummi peqqinnissaqarfiup pisortaata Dr. Maichael Patterson, CBC-mut oqaatigaa.
