Thyge pillugu suliaq allanut utertitsinissamut ammaasinnaasoq

Kommuneqarfik Sermersuumi innuttaasup 2015-imi naammagittaalliuteqarnera annertuumik kinguneqarsinnaavoq.

Tamanna kommunimut – aammali inunnut kommunimit ukioq 2015-inngornerata nalaani ikiorsiissutersisartunut kinguneqarsinnaavoq.

Thyge Østergaard pisortanit ikiorsiissutersisartut ilagaat. Taanna ukiup nikinnerani ullut 14-ikkaarlugit 1014 koruunersisaraluarluni 775 koruuniinnarsisalerpoq. Taassuma pisortanit ikiorsiissutisiarisartakkami sisamararterutingajai tassanngaannartumik annaavai.

AAMMA ATUARUK Thygep pisortanit ikiorsiissutisiarisartagai kommunimik peerneqariataartut

Ajornartorsiutaasorli kommunip aningaatigut ajalusoortoqarnissaanik Thyge Østergaardimut toqqaannartumik nalunaaruteqannginneraniippoq. Tamanna inerteqqutaavoq. Tamannalu Inatsisartut Ombudsmandianit kommunimut isornartorsiuingaatsiartoqarneranik kinguneqarpoq.

Suliaq suli ingerlavoq, Thyge Østergaardimulli aningaasanik utertitsisoqanngilaq.

Suliaq eqqartuussivitsigut suliassanngoratarsinnaavoq, tamannalu Thyge Østergaardip piareersimaffigaa:

- Soorunami. Innuttaasunummi ataasiakkaanut tamanna tunngaviullunilu naapertuilluarneruvoq, taamaammat aalajangiinerminnik allanngortitsinissaannut tunngavoq, Thyge Østergaard oqarpoq.

Kommune 5,5 millionit koruuninik sipaaruteqartoq

Thyge Østergaard pisortanit ikiorsiissutinik ukiup 2015-imut nikinnerani appaavigineqartuni kisimiinngilaq.

Kommunalbestyrelsip pisortanit ikiorsiissutinit 5,5 millionit koruunit sipaarutigai, taamaammat suliat qanoq pissanersut apeqquserneqariartulerput.

Inatsisartut Ombudsmandiata Kommuneqarfik Sermersooq inunnut taarsiissuteqarusunnissaa neriuutigaa.

- Kommunip innuttaasut aningaasanik utertitsiffigissagai maanngaanniit neriuutigineqarsinnaavoq, kommunillu suliat sammiveqatigiit maluniassavai.

- Suliat aamma aallarteqqinneqarnissaat aningaasallu uninngatinneqartut taarsiissutigineqarnissaat aamma neriuutigineqarpoq, Ombudsmandimi eqqartuussiveqarnermut pisortaq, Kim Blokbo oqarpoq.

AAMMA ATUARUK Kommuni suliami pisortanit ikiorsiissuteqarnermut tunngasumi inatsisinik unioqqutitsisoq

Taama pisoqassanersoq suli ilisimaneqanngilaq. Ombudsmandimmi kommunimut isornartorsiugaluarnerani kommunip pisortanit ikiorsiissutinik innuttaasunut toqqaannartumik nalunaaruteqaqqaarani appaasinnaanini pisinnaatitaaffigalugu attatiinnarpaa.

Innuttaasut qanoq amerlatigisut pisortatinit ikiorsiissutini allannguinissaq pillugu nalunaarfigineqarsimannginnersut Kommuneqarfik Sermersuup naluaa.

- Suliaq misissuiffiginialerparput, kisianni naluara, susassaqarfiup pisortaa, Cecilie Schierback oqarpoq.