Thygep pisortanit ikiorsiissutisiarisartagai kommunimik peerneqariataartut

- Assuarnarlunilu pakatsinarpoq.

56-inik ukiullip, Thyge Østergaardip Kommuneqarfik Sermersuumit iliuuseqarfigineqarnini taama nassuiaatigaa.

Thyge Østergaardimi pisortanit ikiorsiissutinik kommunip 5,5 millionit koruuuninik sipaarniarnerminik aalajangiinerani 2015-imut ukiup nikinnerani annikilliivineqartorpassuit ilagaat.

Thyge Østergaard ukiup nikinnerani ullut 14-ikkaarlugit 1014 koruunersisaraluarluni 775 koruuniinnarsisalerpoq. Taassuma pisortanit ikiorsiissutisiarisartakkami sisamararterutingajai tassanngaannartumik annaavai tamannalu aningaasaqarniarneranut eqquingaatsiarpoq.

- Ajalusoorpoq. Ullut 14-ikkaarlugit 1000 koruunersisarnermi kaattoqartareersoq suli akikinnerpaamik ujaasisariaqalerataarpunga, ilaatigullu nerinngiinnartariaqarlunga, Thyge Østergaard oqarpoq.

Tamalaartumik inuuneqarsimasoq

Thyge Østergaard Danmarkimit Nuummut 2008-mi uteqqikkamili inuiaqatigiinni appasissumi inuuneqarsimavoq. Taanna danskimik ataataqarpoq kalaallimillu anaanaqarluni, taassumalu Danmark nunarpullu nikittaallugit najugaqarfigisarsimavai.

Danmarkimiinnermini inatsit qasseeriarluni unioqqutissimavaa. Thyge Østergaard tilliniarneq pissutigalugu marlunnik ilaatigut eqqartuussaanikuuvoq, ikuallatsitsisimanerlu 1999-imi katsorsarneqarnissamik eqqartuussuteqarnermik kinguneqartoq pissutigalugu danskit naalagaaffianut millioninik akiligassaqarluni.

Taakku qaangiummata Nuummut 2008-mi nuuppoq, aalajangersimasumillu suliffissarsiulerluni. Taassumali inuunerisimasaa pissutigalugu tamanna unammillernarpoq, piffissalli ilaani iluatsittarsimalluni.

Thyge Østergaardili 2018-imili angerlarsimaffeqanngitsuulerpoq, qanittumili piffissap ilaani suliffigisartagaqarpoq, maannalu Nuummi containerini inissiani najugaqarluni.

Nalunaaruteqartoqanngitsoq

Taassuma pisortanit ikiorsiissutiminik sisamararterutingajaat ukioq 2015-inngormat annaagamigit pisortanit pilersorneqarpoq, akilerneqartartumilu najugaqarluni.

Ajornartorsiutaasorli kommunip aningaatigut ajalusoortoqarnissaanik Thyge Østergaardimut toqqaannartumik nalunaaruteqannginneraniippoq.

Nalunaarutigineqartutuaq Nuuk Ugeavisimi quppernermi 23-mi naqqarpiaani allagarsiissuteeraq ”aningaasat amerlassusaat naleqqussarneqartut”-nik qulequtsersimasumiippoq.

Thyge Østergaardilli allagarsiissuteeraq atuanngilaa, taassuma kommunip aalajangiinera 775 koruuniinnarnik atorsinnaasaqaleriataarnermini aatsaat paasivaa.

- Ataasinngornermi ullaakkut ikiorsiissutissarsiassakka aagakkit 1014 koruuniunatik 775 koruuniinnanngoriataarsimapput. Tamanna paasisiuminaatsippara, kommunimiimmi annikilliinissaq pillugu allagarsinnginnama, Thyge Østergaard oqarpoq.

Thyge Østergaard kommune pillugu naammagittaalliuteqarniarluni 2015-imi januaarimi aalajangerpoq, ukiulli tallimat affaalu qaangiuttut suliamut suli inerniliisoqanngilaq.

Aaqqissuussinermi ingerlaartoq

Thyge Østergaardip 2015-imi januaarip 26-annili naammagittaalliuteqarnera aaqqissuussinermi ingerlaangaatsiarpoq.

Tamanna Inatsisartut Ombudsmandianit isornartorsiuingaatsiarnermik kommunimiillu nutaanik aalajangiisoqarnermik maannamut kinguneqarpoq.

Tamannali Thyge Østergaardimut allannguinngilaq. Taassuma pisortanit ikiorsiissutaasa eqqunngitsumik apparneqarneranni qaammatini taakkunani aningaasatigut annaasai taarserneqanngillat.

Thyge Østergaardip naammagittaalliutimi ukiorpassuani aaqqissuussinermi ingerlaqattaarnera pissutigalugu malinnaaffiginiarnera ajornakusoortissimavaa.

Kommunilli aalajangiinini attatiinnassappagu suliaq eqqartuussivimmi suliassanngorsinnaavoq. Inatsisartummi Ombudsmandiata Thyge Østergaard ikiorlugu eqqartuussivimmut suliassanngortitseqatigisinnaavaa, tamannalu taassuma piareersimaffigaa.

- Soorunami. Innuttaasunummi ataasiakkaanut tamanna tunngaviullunilu naapertuilluarneruvoq, taamaammat aalajangiinerminnik allanngortitsinissaannut tunngavoq, Thyge Østergaard oqarpoq.

Eqqartuussivimmili sulianngortitsinissamut piffissaq suli sivisuvoq. Ombudsmandip kommunimut isornartorsiuineq nutaaq maanna suliarileruttorpaa, kommunillu tamatuma kingorna aalajangiinini attatiinnarniarpagu Ombudsmandip suliaq eqqartuussivitsigoortinneqassanersoq isumaliutigingaatsiarniarpaa.