Kommuni suliami pisortanit ikiorsiissuteqarnermut tunngasumi inatsisinik unioqqutitsisoq
Thyge Østergaardip Nuummeersup pisortanit ikiorsiissutisiarisartakkami sisamararterutaat ukiut tallimat matuma siorna annaaratarpai.
Pisortaniimmi sapaatit akunneri allortarlugit ikiorsiissutisiarisartagai 1014 koruuniniit 775 koruuniinnanngoratarput.
Kommunili tamanna Thygemut toqqaannartumik pinngitsoorani nalunaarutigisussaagaluarlugu taamaaliunngilaq.
Ombudsmandi arlaannaannulluunniit attuumassuteqarani oqartussaasuuvoq.
Ombudsmandi pisortaqarfiit Namminersorlutik Oqartussat kommunillu ataanniittut inatsisinik naapertuinersut paasiniarlugu qulaajaasarpoq.
Innuttaasut kommunerisaminnit eqqunngitsumik sullinneqarsimasorisut Ombudsmandimut naammagittaalluteqarsinnaapput.
Paasisaqarnerorusukkuit una tooruk.
Tamanna pillugu suliaq - ukiut arlallit matuma siorna aallartittoq - suli naammassineqanngilaq. Kommunip aningaasat taakku ilaat Thyge Østergaardimut utertittariaqarai, Ombudsmandi isumaqarpoq. Kommunili allatut aalajangerpoq.
Suliaq siunersiumallugu kingumut, tassa 2015-imut qiviartariaqarpugut. Kommuni suliami tassani inatsimmik taamanikkut ukiortaanngitsiartoq unioqqutitseqqaarpoq. Kommuni 5,5 millionit koruuninik innuttaasunut pisortanit ikiorsiissuteqarnermi sipaarniuteqassasoq, kommunalbestyrelsi taamanikkut aalajangerpoq.
Ugeavisimi qupperneq 23-mi allagarsiissuteeraq
Kommuni inuit ataasiakkaat pisortanit ikiorsiissutisiarisartagaannik appaagaangami, tamanna inuttaannut toqqaannartumik nalunaarutigisartussaavaa. Kommunili sipaarniuteqartussanngorami Thyge Østergaardimut taamaaliorsimanngilaq.
Kommunilli sipaarniuteqartussanngornini Nuuk Ugeavisimi qupperneq 23-mi 2015-imi decembarip qaammataani allagarsiissuteeraqarnikkut nalunaarutigaa.
AAMMA ATUARUK Kommunip arnamut ikiorsiissutit ilisimatitsissutigeqqaarnagu annikilligai
Thyge Østergaardilli kommunip allargarsiissuteeraa arajutsisimavaa – Inatsisartullu Ombudsmandiata kommunip sipaarniuteqarnera sakkortuumik isornartorsiorpaa:
”Isumaginnittoqarfik tusagassiuutit aqqutigalugit aalajangeeqqusaanngilaq”, Ombudsmandi kommuni sakkortuumik isornartorsiorlugu taama oqarpoq.
Isumaginninnermi Naammagittaalliuuteqarfiup kommuni suliaq pineqartoq pillugu isummeqqeqquaa.
Kommunip suliaq naammaginanngitsumik suliarisimagini maanna nassuerutigaa:
- Innuttaasut sullinneqarnermik ingerlarnginik ilisimanninnissaat allannguerujussuarnerillu pillugit ilisimatinneqartarnissaat neriuutigiuaannarparput. Suliarlu pineqartoq qularnanngitsumik ilikkagaqarfigilluarparput, Kommuneqarfik Sermersuup Oqartussaaffeqarfiani pisortaq Cecilie Schierbeck KNR-imut oqarpoq.
Nutaamik aalajangiinnguatsiartoq
Kommunili suliaq pillugu isummeqqittussanngorami, aalajangiineq siulleq taamaatillugu inatsimmik unioqqutitseqqilluni nutaamik aalajangiivoq.
Thyge Østergaardip - ilisimatinneqaqqaarani - pisartakkaminit sisamararterummik ikinnerusunik pisortanit qaammaterpassuarni ikiorsiissutisiaqartitaanermini annaasai kommunip taarsissagai, Ombudsmandip naatsorsuutigisimavaa.
Kommunili taamaaliunngilaq.
KNR kommunip nutaamik aalajangiinera pillugu paasissutissanik pissarsivoq. Thyge Østergaardip pisortanit ikiorsiissutisiarisartagai kommunip kingumut atuutilertumik ikinnerulersissimagai, paasissutissani taakkunani erserpoq. Kommuni taamaalilluni Thyge Østergaardimut qaammaterpaalunni ikinnerusunik ikiorsiissutisisarsimaneranut taarsiisariaaruppoq.
Tamannali inatsimmik unioqqutitsineruvoq.
Oqartussat kingumut atuutilertumik aalajangeeqqusaanngitsut, Danmarkimi eqqartuussiviit qullersaata eqqartuussisuuneqarfiullu aalajangernikuuaat.
Taamaammat Kommuneqarfik Sermersuup Isumaginninnermi Naammagittaalliuteqartarfik akisussaatilerpaa. Isumaginninnermi Naammagittaalliuteqartarfiullu tamatumani inerniliussaa ersarippoq: Tassa Thyge Østergaard qassinik aningaasassaqarnersoq naatsorsueqquaa.
Ombudsmandillu kommuni isornartorsioqqippaa:
- Kommunip nammineq aalajangikkani taakkununnunngalu inatsisitigut tunngavilersuutini akisussaaffigisariaqarpai. Aalajangernera qularnartoqaqisoq maannamut isumaqarpugut, Inatsisartut Ombudsmandeqarfianni inatsisilerinermi pisortaq Kim Blokbo oqarpoq.
Eqqartuussivimmut suliassanngortinneqarsinnaasoq
Taamaakkaluartoq Kommuneqarfik Sermersooq Thyge Østergaardimut - kingumut atuutilertumik - pisortanit ikiorsiissutisiakinnerulersinnaatitaalluni isumaqartuarsinnarpoq.
Taamaammat Ombudsmandip kommuni suliaq pineqartoq pillugu sakkortuumik aappassaanik isornartorsiortussanngorpaa.
Kommuni kingumut atuutilertumik pisortanit ikiorsiissutisiaqartitsiunnaarnerminut inatsisitigut tunngavilersuisinnaanngittuarsinnarpat, suliaq tamarmi eqqartuussivimmut suliassanngortinneqarsinnaavoq.
- Taamaattoqassappat Ombudsmandip kommuni innuttaasumut inatsit naapertorlugu taarsiiumanngitsutut nalilersinnaavaa, Ombudsmandeqarfimmi inatsisilerinermi pisortaq Kim Blokbo oqarpoq.
- Ombudsmandip innuttaasoq tamatumani kommunimik eqqartuussivimmut tamanna pillugu suliassanngortitsisoq tapersersinnaavaa. Taamaatullu pisoqariaannaavoq.
Kommuneqarfik Sermersooq eqqartuussivimmut suliassanngortinneqarsinnaanini pillugu oqaaseqarumanngilaq.
Kommunillu Ombudsmandip isornartorsiuteqaqqinnissaa maanna utaqqimaarpaa.
