Kommunip arnamut ikiorsiissutit ilisimatitsissutigeqqaarnagu annikilligai
![](/sites/default/files/styles/image_934x467/public/article_images/kommuneqarfik-sermersooq-raadhus.png?itok=Hr4FJHBu)
Innuttaasumut pisortanit ikiorsiissutit Kommuneqarfik Sermersuup 2015-imi iliiuserisaatut aviisitigut oqaatigiinnarneratigut appaannarneqarsinnaanngillat.
Innuttaasut eqqugaasussat kommunimit toqqaannartumik kalerrinneqassapput.
Inatsisartut Ombudsmandiat Kommuneqarfik Sermersuumut isornartorsiuilluni oqarpoq.
Allannguutit aviisimi sapaatip akunneranut saqqummersinneqartartukkut nalunaarutigigai
Appaasoqarnera pillugu suliaq 2015-imi januaarimi aallartippoq, tassani innuttaasup ikiorsiissutit kommunimit pisartakkani ukiup nikinneranit apparneqarnerat ombudsmandimut naammagittaalliutigai.
Innuttaasoq ullunut 14-inut 1.014 koruuninik pisortanit ikiorsiissutisisaraluarpoq, ukiulli nutaap aallartinnerani ikiorsiissutit taakku 775 koruuninut apparneqarput.
Kommunip pisortanit ikiorsiissutini 5,5 millionit koruuninik sipaarniuteqarnissaminik aalajangiineranut atatillugu taama pisoqarpoq.
Innuttaasup naammagittaalliuteqarnermini kommunip appaanissamut ilisimatitsissuteqarsimannginnera aamma naammagittaalliutigaa.
Kommunip appaanissaa Nuuk Ugeavisimi kisimi saqqummersinneqarpoq, tamannalu naammanngitsoq ombudsmandi isumaqarpoq.
- Ingerlatsivik tusagassiuutit aqqutigalugit aalajangiisinnaanngilaq. Ingerlatsivik innuttaasumut tunngatillugu aalajangiigaangami innuttaasumut toqqaannartumik nalunaaruteqartassaaq, Inatsisartut Ombudsmandiat, Vera Leth oqarpoq.
Pisortat allannguutinit paasissutissiinngikkunik allannguutit atuutissanngitsut, ombudsmandip aalajangersarpaa.
Naammagittaalliuteqartarfiup ajornartorsiutertaa takusinnaanngikkaa
Ombudsmandip naammagittaalliuut innuttaasut isumaginninnermut tunngasunut naammagittaalliuteqartarfianut, Isumaginninnermut Naammagittaalliuteqartarfimmut 2015-imi februaarimi ingerlateqqippaa.
Isumaginninnermut tunngasunik naammagittaalliuteqartarfiup suliaq ukiuni marlunni qaammatinilu sisamani misissuiffigaa, ukiullu arlallit misissuereerami kommunip iliuusaani kukkusoqanngitsoq nalunaarutigalugu.
Naammagittaalliuteqartarfiulli aalajangiinera suliamut matussusiinngilaq, ombudsmandimmi suliamut nammineq misissuisitsinini aallarnerpaa, taannalu ima inerniliivoq:
- Kommuneqarfik Sermersuup innuttaasumut pilersuinermut ikiorsiissutinik appaanera inatsisinut atuuttunut naapertuinngilaq. Isumaginninnermillu Naammagittaalliuteqartarfiup kommunip aalajangerneranik 2017-imi atuutsitsiinnarnera aamma inatsisinut naapertuinngitsoq Ombudsmandip nangilluni erniliissutigaa.
- Kommuneqarfik Sermersuup Isumaginninnermillu Naammagittaalliuteqartarfiup suliamik isumaginninnerat isornortuutippara, Ombudsmandi, Vera Leth oqarpoq.
Suliaq ingerlateqqinneqartoq
Ombudsmandip misissuinerani kommunip isornartorsiuinerup akinissaa tunuarsimaarfigaa, kommunilli kingullermik oqaaseqarnermini sukaterisoqartariaqarnera nassuerutigaa.
- Siunissami aningaasat annertussusaannik allannguinissani inunnut ataasiakkaanut eqqugaasussanut aalajangiinermik nassiussisarnissarput eqqumaffigilissavarput, kommuni allappoq.
Ombudsmandip isornartorsiuinera Isumaginninnermik Naammagittaalliuteqartarfiup suliamik ingerlatitseqqilerneranik kinguneqarpoq, ombudsmandillu naammagittaalliuteqartarfiup aalajangiinera nutaaq naatsorsuutigiumaarlugu paasissutissiissutigaa.