Thorningip ”selfieliaa" nunarsuaq tamakkerlugu aviisit saqqaanniittoq

Danskit ministeriunerata selfiemik assiliniarluni tallini siaarsimagai internettimi ippassaq sammineqangaatsiarpoq ullumilu nunarsuaq tamakkerlugu aviisit saqqaanni aamma takuneqarsinnaalluni.

Ilaatigut aamma Tuluit Nunaanni, pisorlu tassani isornartorsiorneqarpoq.

'No selfie respect, Cam and Obama in cheesy pic' tuluit aviisiat The Sun allappoq, Nelson Mandelagaluallu Sydafrikami ippassaq eqqaaniarneqarnerani imminut taamatut quianartunik assiliisoqarnera naleqqutinngitsuunerarlugu.

Helle Thorning-Schmidt (S) nunarsuarmi angutit pissaaneqarnerpaasa ilaat David Cameron aamma Barack Obama akornanni issiavoq, oqarasuaatinilu angallattagaq taskiminit tigoriarlugu issiaqatinilu imminut assilivoq.

The Sun nittartakkamini aamma ima aperivoq; 'Ilisisoqarnerani taamatut imminut assilineq ilumut tulluunnerluni?'

Daily Mirror aamma isornartorsiuivoq, asserlu maanna nunarsuaq tamakkerlugu tusaamasaalersoq aviisip saqqaani oqaasertalersimavaa "sianiitsorpallanneq".

Aammattaaq The Times ullumi allappoq ippassaq taamatut assiliisoqarneratigut Obama 'ilisisoqarnerani ileqqussat' killissaannik misileraasoq.

Aviisimilu The Guardianimi tusagassiortoq ingasattajaaqqusinngilaq.

- Obamap, Cameronip Thorning-Schmidtillu nuannisarnerat iluarinngikkaanni tamanna kukkuneruvoq, John Crace The Guardianimi taama allappoq.

- Eqqaaniaasoqarnera tamaat illaqattaarsimasuuppata tamanna kukkunerusimassagaluarpoq. Kisianni taamaaliunngillat. Ilumoorsaartussanngoramik ilumoorsaarput, John Crace naggasiivoq.