Thorningip ammaalluni oqalugiaata Nunatsinnut tunngasunik imaqarpallaanngilaq

Thorning Schmidtip oqalugiarnermini Nunarput eqqaagamiuk, oqarpoq naalagaaffeqatigiinni aatsaat taama annertutigisunik suliassaqartoq, taakkulu ataatsimoorluni aaqqinniagassaasut.

Kalaallit Nunaanni utoqqaat amerliartulerpata inuusuttullu ikiliartulerpata unamminartussat aamma eqqaavai.

_ Kalaallit Nunaata inuussutissarsiutiminik ineriartortitsinissani pisariaqartippaa allanik, isertitaqarfissaminik pilersitsiniarluni, tamannalu ilaatigut aatsitassarsiornikkut pisinnaavoq, ministeriuneq erseqqissaavoq.

- Saviminissamik piiaaneq uuliamillu qalluineq  piuminartuupput. Tamannali uranimik piiaanermut avammullu nioqquteqarnissamut atuutinngilaq, ministeriuneq oqarpoq.

Danskit kalaallillu ataatsimoorlutik nalunaarusiaat aamma qilanaarinerarpaa, tassanimi ilaatigut nunat tamat susassaqarfimmut malittarisassiuussaat assigiissaarinerilu qulaajarneqartussaapput nunallu allat misilittagaat aamma ilanngunneqartussaallutik.

- Nalunaarusiaq Kalaallit Nunaata Danmarkillu qanittumik suleqatigiikkusunnerannut uppernarsaataavoq. Danmarkimi naalakkersuisut Kalaallit Nunaannilu naalakkersuisut Kalaallit Nunaata susassaqarfimmi suliaqarnissaanut inatsisitigut killiliussat assigiimmik isummerfigisimanngilaat. Tamannalu aamma nalunaarusiami atuarneqarsinnaajumaarpoq, ministeriuneq oqarpoq.

Peqatigiillunili, inatsit tunngaviusoq namminersornerlu pillugu inatsit ataqqillugit aatsitassarsiornikkut suleqatigiinnissamik nassaartoqarnissaa qularutiginnginnerarpaa.

Issittumi silap pissusiisa allanngoriartornerisa nutaanik unammilligassaqartitsilernerat aamma eqqaavaa - ilaatigut ujaasinermut, annaassiniarnermut imaanilu avatangiisit illersorneqarnissaannut tunngatillugu.

Folketingimi amerlanerussuteqartut aalajangiinerat naapertorlugu, issittumi siunissami suliassat naammassiniarnissaannut piareersimasussaavugut. Suliassarlu taanna naalakkersuisut pingaartittupilussuuaat.

- Taamaammat suliassaqarluarpugut. Aamma suliat assigiinngitsunik isumaqarfigisavut suleqatigiissutigissavagut, Helle Thorning-Schmidtip Folketingimi ullumi ammaalluni oqalugiarnini taama naggaserpaa.