Thorning ataataqanngitsut pillugit tatineqaleraluttualersoq
Naalakkersuisut siulittaasuat inatsisitigut ataataqanngitsut peqatigiiffiannit aamma Inuit Pisinnaatitaaffiinut Kalaallit Nunaata Siunnersuisooqatigiivinit maanna taperserneqarneqarpoq.
Europami inuttut pisinnaatitaaffiit pillugit isumaqatigiissutip atuutilersinneqarneraniilli inatsisitigut ataataqanngitsut inuttut pisinnaatitaaffiisa innarlerneqarsimanerat pisortatigoortumik akuerineqarnissaa Inuit Pisinnaatitaaffiinut Kalaallit Nunaata Siunnersuisooqatigiivi kaammattuuteqarput. Siulittaasup, Aaja Chemnitz Larsenip, kingornussarsiassat pillugit suliap inereerneqarnerani kingornussinngitsoornermut taartisiassatut ajunngitsorsiassaqartitsisarnissap isummerfigeqqinneqarnissaa kaammattuutigaa.
Tida Ravnip, inatsisitigut ataataqanngitsunut oqaaseqartartuusup, suliap aningaasatigut taartisiaqartitsisoqarneranik inerneqarnissaa aamma kissaatigaa.
- Taamatut aaqqiissuteqarnissaq oqartussaaqatigiinnermut tulluarnerpaallunilu naapertuilluarnerpaassaaq. Taamaaliornikkummi inatsisitigut ataataqanngitsut kinguaavullu allat assingalugit kingornussisussatut inissinneqarsinnaalissapput. Peqatigisaanillu ilaqutarilikkat kingornussereersimasut ilerasuuteqalersinnissaat pinngitsoortinneqarsinnaassaaq, Tida Ravn taama oqarpoq.
Inatsisitigut ataataqanngitsut pillugit inatsisissaq nutaaq Folketingimi apriilip 29-ani naammassillugu suliarineqartussaavoq. Taartisiaqartitsinissamullu apeqqut danskit naalakkersuisuisa maannamut isummerfigiumasimanngilaat.
