Theresa Mayip oqalugiarnini sutigut tamatigut iluatsinngitsooraa
- Tunuarnissaq eqqarsaataanngilluinnarpoq, Sky News naapertorlugu Downing Streetimit nalunaarummi tamanna oqaatigineqarpoq.
Premierministerip konservativet partiianni siuttuunera juunimi qinersisoqarnerani partiip kinguariarnerata kingorna sanngiillivoq.
Mayip oqalugiarnera kipisaqattaarpoq, premierministeri sakkortuumik quersoqattaarmat.
Aammattaaq quiasaarisartumit akornuserneqarluni unitsinneqarpoq, taanna Mayip oqaluttarfianukarmat allagartamillu inuit soraarsitaagaangata tunniunneqartartumik tunillugu.
Mayip tunuatungaani allagartami naqinnerit nakkaalermata aamma Mayip oqalugiarnera akornuserneqarpoq.
BBC naapertorlugu, Mayip oqalugiarnerata kinguniatsianngua konservativet partiianni ilaasortat ilaasa May tunuartariaqannginnersoq oqallisigaat.
Mayip oqalugiarnermini naqissuserpaa brexit pillugu isumaqatigiinniarnerni "pisinnaasut tamaasa" tuluit naalakkersuisuisa piareersimaffigigaat. EU-mut isumaqatigiissuteqanngitsoortoqarsinnaanera ilanngullugu.
2019-imi marsip qaammataani isumaqatigiissut piviusunngortinneqareertussaavoq isumaqatigiinniarnerilli suli aallartilluarneqanngillat.