Thala Hansenip Christianiami pisut qanimut malinnaaffigai

Thalap politiit marluk inullu alla pingasunngormat unnukkut aallaasersortoqarnerani aallaaneqarmata tusaasimanngilaa. Annilaarnartumilli pisoqarnerata kingorna misigisaqarpoq.

- Silaannaa ajorpoq, nuanniilliortoqarnikuummat pissangaasarujuppugut, Christianiarmiut eqqugaasunut ilaqutaasunullu misiginneqataasorujussuupput, Thala Hansen oqarpoq, nangillunilu:

- Tamakkua akuersaarneqarsinnaannginnamik, Christianiarmiut aamma peqqarniilliortarneq taamalu aamma inunnik attuisarneq akerlerisorujussuugamikku, Thala Hansen KNR-imut oqarpoq. 

Nammineq misigisani aallaavigalugit oqaluttuarluni, taassuma erseqqissaatigaa.

Pingasunngornerup unnukkuani aallaasersortoq tigusariniarsaralugu politiit Christianiamiingaatsiarput. Thala Hansenilu naapertorlugu inuit Christianiamit ingerlaniartut tamarmik ingerlanissamut akueritinnissamut assilineqarput, misissorneqarlutillu nalunaarsorneqarput.

Pingasunngormat unnukkut pisoq ilungersunangaarmat politiit immikkut sungiusakkat takkupput, taakkulu kalaallip christianimiup takuai. 

- Allatut ajornartumik imerniartarfimmeerujoorluta utaqqivugut, soorunami nalunngilarput politiit takkutissasut, taamannak pisoqarsimammat anti-terror copsiussagunarput - iluamilli erseqqissumik oqaatigisinnaanngilara, ulluinnarni politiit maanga isertartunit allaanerujuupput, maskinpistolilersuullutik sakkortoorujussuarnik qaammartartoqarlutik angalaarujoorput Christianiami imerniartarfimmut iserfigivaatigut tamatta assagut takuteqquaat, Thala Hansen oqaluttuarpoq.

25-nillu ukiulik tigusarineqartoq christianiamiuunngitsoq, Thala Hansenip erseqqissaatigaa.

- Nalunngilarput Christianiarmiuunngitsoq, ajoraluartumik Christianiarmiuunngitsorpassuit aamma maaniittaramik, taakkuugajuttarlutillu kusanaalliortut, soorlu aamma politiinut milloortartuusarput maanimiuunngitsut, pisiniat pulaartut, Christianiarmiut taamaaliortuuneq ajoramik maanimi tamanna inerteqqutaalluinnarpoq, Thala Hansen oqarpoq.