Telep nassitsissutai amigaartoorfiusussanngorput
Akiusussat Telestyrelsep aalajangiussai 2015-ip tungaanut atuutissapput, TELE-POST-imullu isaatitsissutaavallaarunnaarnissai TELE-POST-ip pisortaata Steen Montgomery-Andersen-ip tupinnanngitsumik nuannaarutigivallaanngilai.
- Isumaqatigiissutip ukiuni marlunni atuuffissaa uagut amigartoorutisussaassavarput. Ukiormi 2015 angugutsigu sinerissami nassitsissutit amigartooruteqarlutik ingerlasimanissai maanna takusinnaalereerparput. Tamannalu tupinnanngitsumik iluarinngikkaluaqaarput. Telestyrelselli aalajangiussaa ataqqillugu malissavarput, Steen Montgomery-Andersen knr.gl-mut taama naqissusiivoq.
Telestyrelselli aalajangiussaata eqqartuussivilersuussinikkut allanngortinniarneqarsinnaanera TELE-mit suli isummerfigineqanngilaq.
- Eqqartuussivilersuussissangaluaruttaluunniit inerniliisoqarnissaata tungaanut akiusussatut aalajangiussaq atuuttussaavoq. Periarfissarlumi taanna uagut siulersuisuusugut suli isummersorfigisimanngilarput, unammilligassariligassavulli unammillerniarpavut, tassa uagut nammineq aningaasaativulluunniit atussangaluarutsigit unammilleqataaniarpugut, Steen Montgomery-Andersen oqarpoq.
Nuummili internettimik atuisartut siulliullutik isumalluaqqaartussaassapput. Internettimi akikinnerusoq, sukkanerusoq, Giga-bit-illu suli amerlanerusut Nuummiunut periarfissaalissapput.
- Inatsisit maanna atuuttut allanngorpata atuisartutsinnut qanoq neqerooruteqalissanersugut maanna erseqqissumik oqaatigisinnaanngilara, akilli tamarmik apparneqarnissaat naatsorsuutigaara. Akinillumi appaanerit Nuummiuinnaanngitsut misigissavaat, tassami akinik appaanerit sinerissap sinneranut aamma atuutsinneqassammata. Atuisartuvummi Nunatsinniittut sumiikkaluarunilluunniit immikkoortinnianngilavut,TELE-POST-imi pisortaanerugallartoq Steen Montgomery-Andersen oqarpoq.
Isorliunerusut TELE-POST-imit pinngitsoorani aamma pilersorneqartussaammata sullinneqarneri akisunerugaluaqaat. Isorliunerusunimi inuisannerusuni illoqatigiiaat ataatsit TELE-miit sullinneqartussanngornerat 50.000 koruunit angullugit aningaasartuutaasarpoq.
- Nuna tamakkerlugu attaveqaatitsineq ukiumut 125 millionit koruunit missaannik aningaasatuutigisarparput. Attaveqaatimmi ataavartumik aserfallatsaaliugassaapput radioqarfiillu sineriammiittut aqqutaat suli inerisartuarlutigit. Taakkulumi akisoqaat. Nuummilumi unammillersariligassatta aningaasartuutit tamakku eqqarsaatigisariaqanngilaat. Uagulli tunniutiinnartinnialersaanngilagut. Tassami TELE-POST Nuummi, nunattalu sinnerani internettimut neqerooruteqarsinnaasut maanna annersaraat pingaarnersaralugulu, siunissamilu taamaaginnartoqarnissaa siunniuteqqavarput, Steen Montgomery-Andersen oqarpoq.
