Telemi suliumajunnaarnerup atuisut eqqorpai
Teknikerit peqatigiiffiata Attaveqaat-ip isumaqatiginniutissamik nutaamik Namminersorlutik Oqartussat isumaqatigiissutit pillugit immikkoortortaqarfianut tunniussipput, teknikerit peqatigiiffianni Attaveqaammi siulittaasoq Jonathan N. K. Petersen oqarpoq.
Isumaqatiginniutissatut siunnersuutip nutaap imarisai ataasiakkaat pillugit Jonathan N. K Petersen oqaaseqarnianngilaq, kisiannili isumaqatigiinniutissatut siullertut saqqummiunneqartumit piumasaqaatigineqartut sakkukinnerusut unnerpai.
Namminersorlutik Oqartussani isumaqatigiissutit pillugit immikkoortortaqarfiup akissuteqarnissaa maanna utaqqineqarpoq.
Teknikerit peqatigiiffianni Attaveqaat mi ilaasortat 44-it suliumajunnaarput.
Ilaasortat amerlanerit Tele Greenlandimi sulisuupput.
Tele Greenlandimit nalunaarutigineqarpoq, oqarasuaatikkut qarasaasiatigullu attavilersinniartut 350-it missaannik amerlassuseqartut suliumajunnaartoqarnera pillugu attavilersinneqarsinnaanngikkallartut.
Tele Greenlandimi atuisut 111-it missaannik amerlatigisut, oqarasuaatikkut qarasaasiatigullu attaveqaataat ajoquteqarput, taakkulu suliumajunnaarneq qaangiuppaat aatsaat attavilersinneqarsinnaasut, Tele Greenlandimi sulisoqarnermut pisortaq Karl-Henrik Simonsen oqarpoq.
Peqqinnisaqarfimmi, politiini, qatserisartuni, sinerissami nakkutilliisoqarfimmi Kangilinnguaniittumi aamma angallatit timmisartullu radioatigut attaveqaatit
ajoquteqalissagaluarpata, teknikerinik sulisussanik piareersimatitaqartoqarpoq.
Sulimajunnaarnerup nalaani piareersimatinneqartut pingasoriarlutik suliartortariaqarsimapput.
Angallatit radioata sakkortusaavia Maniitsup eqqaaniittoq iluarsaanneqarsimavoq.
Uummannami napparsimavimmi oqarasuaatit attaveqaataat ajoquteqalermat suliarineqarpoq. Sisimiuni KNR-TVip analogimut nassitsissutaa ajoquteqarmat iluarsaanneqarsimasoq, Tele Greenland KNR imut taamatut nalunaarueqarpoq.
