Tele sinneqartoorpoq

Suliffeqarfissuup Tele Greenlandip, akileraarutit akilinnginnerini 69,5 millionit koruuninik sinneqartoorluni 2010 anigorpaa, naatsorsuutillu taakku ukiup siulianut naleqqiullugit 6 millionit koruuninik pitsaanngoriaateqarput. Angusaq tamanna siulersuisut siulittaasuannit Agner N. Markimit naammagisimaarneqarpoq.
Allattoq Elisa Isaksen
apriilip 18-at 2011 13:22

Taamatut sinneqartooruteqarnerup kinguneranik, ingerlatseqatigiiffik piginnittumut, Namminersorlutik Oqartussanut, iluanaarutiminit 32 millionit koruuninik akiliuteqarnissaa naatsorsuutigineqartoq, suliffeqarfimmit tusagassiuutinut nalunaarummi ilisimatitsissutigineqarpoq.

Niuernermik ingerlatsivik Tele, suliffeqarfissuup naatsorsuutaanik kaaviiaartitaanillu iluaqusiisuuvoq. Suliffeqarfiup attaveqaqatigiinnermik sullissineranit isertinneqartut 58,6 millionit koruuniupput. Kaaviiartitat siorna 680 millionit koruuniupput, 2009-mi 638,7 millionit koruuniusimallutik.

- Tele piffissami matumani ineriartorluarpoq, attaveqaammik annertusaaneq akisooq aningaasaliffigisinnaallutigu atuisullu pitsaassutsimik suli pitsaanermik atuisinnaatillugit, piginnaasamik annerusumik akinillu appasinnernik atugassaqartillugit, siulersuisut siulittaasuat oqarpoq.

Niuernermik ingerlatsiviup Postip sinneqartoorutai 9,3 millionit koruuniupput, ukiup siuliani sinneqartoorutit 7,9 millionit koruuniullutik.

- Suliffeqarfimmik ingerlatsinerup nassiussatigut taama annertutigisumik ikiliartorfiusup ineriartortinniarnera assorsuaq unamminaraluartoq, angusaq pitsaasuuvoq, siulersuisut siulittaasuat Agner N. Mark naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq