TELE-POST iPad-inut suliniummut tapersersuivoq
Kisiannili suliniutip ilusilersugaaneranut sunniuteqarsinnaanngilagut, kisiannili maannarpiaq sullitavut allat eqqornaveersaarlugit Villumfonden-ip kissaatai naammassiniarlugit sulivugut. Tassani unammilligassaavoq, Villumfonden-ip iPad-it mobilinut attaveqaatinut attaveqarsinnaanissaannik kissaateqarnera, tassalu atuarfiit internetimut attaveqaataat, kommunit aallaqqaammulli suliniuteqarnerminni siunnerfigisaat kisimik tassani pineqanngillat.
Tamatuma kingunerisaanik TELE-POST-imi mobilinut attaveqaatit annertusinissaannut aningaasaliisariaqartussaavugut, atuisullu allat eqqarsaatigalugit minnerpaamik tamatumunnga aningaasartuutit matussuserneqartariaqartut isumaqarpugut. Tamatuma saniatigut suliniummut tapersiinermut TELE-POST-ip isertitaqarnissaa naatsorsuutigineqanngilaq.
Kiisalu taasassaq pingaarutilik tassaavoq, TELE-POST-ip suliniummut akiusoq nammineerluni aalajangersinnaanngimmagu. Taamaattumik suliniummut qanoq sinaakkusiinissamut periarfissaqarnerput pillugu Nalunaarasuartaateqarnermut Aqutsisoqarfik maannarpiaq oqaloqatigaarput. Nalunaarasuartaateqarnermut Aqutsisoqarfiup uagullu pilertortumik, kisiannili ajornanngippat atasinnaasumik aaqqiissuteqarnissarput pingaartipparput.
