TELE-POST-ip ilisarnaataa atornerlunneqartoq
TELE-POST-ip ilisarnaataa atornerlullugu nittartakkamik peqquserluttuliornissamik siunertaqartumik pilersitsisoqarsimasoq, TELE-POST Facebookkimini allaaserisaqarpoq.
Suliffeqarfiup ilisarnaataa atorlugu nittartakkamik sanannittut Facebookkimik atuisartut isissutigisartagaannik, tassa e-mailiannik aammalu kodiannik pissarsinissamik siunertaqartoq TELE-POST-imi attaveqaqatigiinnermut pisortap KNR-imut ilisimatitsissutigaa.
- TELE-post-ip ilisarnaataa atornerlullugu TUSASS-inik akeqanngitsunik agguaaniartuusaarlutik qupperniliorsimapput. Isernermi Facebookimut isertarfimmut ilumuunngitsumut atuisut ingerlateqqinneqartarput, e-mailitik koditillu allakkaangamikkit nittartakkatsinnut ingerlateqqinneqartarlutik, Arnakkuluk Jo Kleist KNR-imut oqarpoq.
- Atuisut Facebookimut isersoralutik e-mailitik koditillu allakkunikkit paasissutissat taakku peqquserlunnissamik siunertaqarlutik qupperniliorsimasunut tunniutissavaat, Anakkuluk Jo Kleist nassuiaavoq.
E-mailit kodillu atorlugit quppernermut isersimagaanni Facebookimut isissutissat allanngortipallannissaat pingaaruteqartoq TELE-POST-i ilisimatitsivoq.
- Qupperneq TELE-POST-ip sanaarinngilaa aamma TUSASS-inik akeqanngitsunik agguaasoqanngilaq, Arnakkuluk Jo Kleist erseqqissaavoq.
Taassuma aamma ilisimatitsissutigaa peqquserlunnissamik siunertalimmik nittartagaliaq internettissutit Google Chrome aamma Firefox atorlugit iserfigineqarsinnaajunnaareerpoq.
Explore Safarilu atorlugit iserfigineqarsinnaammat TELE-POST-i mianersoqqusivoq naqissuseqqillugulu suliffeqarfissuaq TUSASS-inik akeqanngitsumik agguaanngimmat quppernermillu taamatut siunertalimmik sanaaqarani.
