Tele-Post: Immap naqqatigut kaabeli arlaliulluta akilersinnaassavarput
Nunavumi illoqarfik Eqaluit internetsimut atassuserneqassaaq, Eqalunniillu Nuummut immap naqqatigut kaabelimik ikkussisoqarnissaa pilersaarutaavoq.
Tele-Post naapertorlugu suliniut nunatsinni ingerlatsiviup atuisuinut iluaqutaasinnaassaaq.
- Nunatsinniittunut sunniutissaa pitsaasuinnangajavittut nalilersinnaavara, Tele-Postimi tamakkiissumik tuniniaanermut pisortaq Flemming Drechsel oqarpoq.
Eqalunni innuttaasut ullumikkornit pitsaaneroqisumik internetsimut atassuteqalernissaannut ikiornerisa saniatigut immap naqqatigut kaabelimik ingerlatsinermut akiliisussat amerlinerinik kinguneqassaaq.
- Immap naqqatigut kaabeli atulermalli ajornartorsiutitta ilagaat taassuminnga atuisut inuit ikittuinnaagatta. Taavalu immap naqqatigut kaabelimik atuillutillu ingerlatsinermut akiliisussat amerlinerat iluaqutaassaaq, Flemming Drechsel oqarpoq erseqqissaallunilu:
- Kalaallit Nunaannni inunnut attaveqarneq allanngornavianngilaq. Immap naqqatigut kaabeli naammattunnguanik piginnaasaqarpoq, imaqarsinnaavoq.
Sukkanersusumik internetseqarnissamut Nuuk aqqutissat qaninnersaraat
Eqalummiut ullumikkut internetsimut qaammataasakkut attaveqarput, soorlu nunatsinni Tunumi Avannaanilu taamaattoq.
Attaveqaatit taamaattut akisuujupput, kigaallutik tatiginarpiarnatillu, Flemming Dreschel oqaluttuarpoq.
- Soorunami nunatsinnisut sukkanerusumik tatiginarnerusumillu attaveqarsinnaaneq kissaatigaat, Flemming Drechsel oqarpoq.
Internetsimullu attaveqarfissaq qaninnerpaaq Nuukkoorpoq, Canadap kujataatigut internetsimut attaveqarfissat suli ungasinnerummata.
- Uppernarpianngikkaluarpoq, kisanni tassa qaninnerpaavoq.
Suliniummut Canadap naalakkersuisuisa 766 mio-nit neriorsuutigai
Canadami naalakkersuisut suliniummut 766 milliunit koruuninik aningasaliiniarlutik Nunavut ilimasaaripput, saniatigullu Nunavup naalakkersuisuisa 152 milliuunit koruunit atussmaarpaat.
Tele-Postip Nunavumi oqartussaasut Kalaallit Nunaata immap naqqatigut kaabeliutaanik qanoq ilillutik atuisinnaanerat pillugu piffissami aggersumi oqaloqatiginiarpai:
- Suleqatigiinnerup qanoq ingerlasinnaanera piffissap tullinnguuttup takutikkumaarpaa, kisianni saaffigineqarnerput nuannaarutigeqaarput, Flemming Drechsel oqarpoq.
