TELE-POST-imi tillinniariaraluarnermut peqataasutut pasisaq tigusarineqartoq

TELE-POST Nuummiittoq pingasunngormat tillinniarfigiteriaraluaqqippoq. Tamatumani tillinniat ammasarfiup nalaani postbokseqarfikkut iserlutik tillinniariaraluarput.

Tillinniaqataariaraluartutullu pasisaq tallimanngornermi nalunaaqutaq 10:59 tigusaavoq. Pigaartuuneq Malik Olesen taama paasissutissiivoq.

- Tigusarisaqarpugut. Ullup ingerlanerani killisiuisoqassaaq, tamatumalu kingorna susoqassanersoq nalilerumaarparput, Malik Olsesen oqarpoq.

AAMMA ATUARUK Nuummi Tele-Posti tillinniarfigiteriaraluaqqittoq

TELE-POST-ip nakkutiginninnermut atortui atorlugit pasisaq nassaarineqartoq, pigaartuunerup oqaatigaa.

Tillinniariaraluarnermut peqataasutut pasisanik allanik suli ujaasillutik, Malik Olesenip ilisimatitsissutigaa.

TELE-POST-ip Nuummi illuutaani tillinniarnerit amerlapput, pingasunngornermilu tillinniariaraluarnerup kingorna ammasarfiit allanngortinneqartut, pisortap Per Svendsenip siornatigut oqaatigaa.

- TELE-POST Centeri Nuummiittoq ajoraluartumik piffissami kingullermi arlaleriarluni tillinniarfigeriarneqarpoq tillinniarfigineqarlunilu, taamaattumik tamanna unitsinniarlugu iliuuseqartariaqarpugut. Tillinniarnerit aamma tillinniariaraluarnerit tamaasa tunngavigalugit maannakkuugallartoq allatut ajornartumik postboksinut ammasarfiit sivikillisariaqarpavut, allakkerinermut pisortaq Per Svendsen oqarpoq.

AAMMA ATUARUK Tele-Postimi tillinniarsimasutut pasisat tigusarineqartut

AAMMA ATUARUK Nuummi TELE-POST-imi tillinniartoqartoq