TELE-POST AWG 2016-imut pingaarnertut aningaasaliisuussaaq
Arctic Winter Games 2016 nunatta oqaluttuarisaanerani aaqqissuussani annertunerpaassaaq.
Maannalu qulakkeerneqarpoq TELE-POST pingaarnertut aningaasaliissasoq, soorluttaaq AWG 2002-mi aamma pingaarnertut aningaasaliisuusoq, Kalaallit, Iqaluit Nunavummiittoq peqatigalugu aaqqissuussineq taamani suliaraat.
Aningaasaliinissamut isumaqatigiissut pillugu TELE-POST-imi pisortaaneq Michael Binzer ima oqarpoq.
- Arctic Winter Games 2016 pillugu aningaasaliisussatut isumaqatigiissut TELE-POST-imut pissusissamisoorpoq, aaqqissuussaq inuiaqatigiinnut minnerunngitsumillu inuusuttunut aningaasaliinertut isigigatsigu , Michael Binzer oqarpoq, nangillunilu:
- Unammiuaarnerit nalaanni piginnaasatigut sutigut tamatigut piorsaasoqassaaq, tamannali minnerunngitsumik nunatsinni inuussutissarsiortunut iluaqutaassaaq -
Kalaallit Nunaannut periarfissatsialaavoq nittarsaannissamut ataasimoorlunilu kivitseqatigiinnissamut, TELE-POST-imi pisortaaneq Michael Binzer oqarpoq.
Arctic Winter Gamesimit aaqqissuisut neriuutigaat unammiuaarnissamut suliaq inuiaqatigiit ataatsimoorfigissagaat Kalaallit Nunaata inuusuttutigut, timersortartutigut, kultoorilerisutigut, piumassutsiminnillu sulisutigut avammut kiinnaanik takutitsiviusussaq, piffissami pineqartumiinnaanngitsoq kisiat aamma taassuma kingorna siunissamilu.